Conseguiu demostrar que co consumo diario do ácido graxo en determinadas doses se pode chegar a reducir o risco de sufrir enfermidades cardiovasculares
14 feb 2019 . Actualizado ás 05:00 h.As enfermidades cardiovasculares son a principal causa de morte en todo do mundo. Calcúlase que no 2030 propiciarán o falecemento de máis de 23 millóns de persoas. Este dato é fundamental para entender a importancia do estudo elaborado polo ribeirense Breixo Ventoso, que mañá será presentado na primeira Xornada de Nutrición e Saúde de Ribeira. Trátase das conclusións dun ensaio que demostra que un aporte diario de omega 3 pode diminuír algúns dos factores de risco cardiovascular.
Este estudo constitúe a fase experimental da tese de doutoramento en Nutrición e Saúde do ribeirense e é froito de varios anos de traballo. O proceso comezou coa procura de fórmulas para mellorar a asimilación proteica, coas que se pretendía optimizar a enerxía muscular dos deportistas de alto rendemento, pero acabou estendéndose a outro sector da poboación. Breixo Ventoso puxo o seu plan en marcha coa axuda de Francesco Visioli, profesor de Nutrición Humana na universidade de Padua, para o que levou a cabo un estudo piloto, consistente en subministrarlle a 10 persoas da zona unha dose diaria de omega 3. Eran veciños con hipertensión, colesterol ou problemas similares e, polo tanto, propensos a sufriren enfermidades cardiovasculares: «Queriamos demostrar que era posible reducir eses valores negativos e conseguímolo».
Para a elaboración deste estudo, empregouse unha especie de atún procedente de dúas zonas de África, o río Congo e Senegal. Os motivos da elección foron as características dos exemplares: «Conteñen unha cantidade maior de omega 3 pola súa alimentación, baseada en sardiña, verxel e peixes voadores; e tamén polo seu método de procesado, pois non se emprega sal nin outros engadidos».
Vos próximos pasos
Con esta materia prima, da que destinaron ao proxecto un millar de latas, lograron diminuír preto dun 20 % os valores lipídicos dos pacientes e, polo tanto, reducir o risco desas persoas de padecer enfermidades cardiovasculares. «Demostramos que cunha cantidade mínima de omega 3, a que recomenda a Organización Mundial da Saúde, é suficiente e pode actuar tamén de axudante dos medicamentos tradicionais», explica Ventoso.
O ribeirense está convencido de que co seu estudo quedan demostrados os beneficios do omega 3, consumido sempre nunha cantidade determinada e a unha hora concreta, aínda que considera que o ideal sería indagar nos efectos a gran escala, comprobar o que ocorre cando a poboación en xeral inxire esa dose: «Igual conseguimos previr as enfermidades cardiovasculares ou reducir o uso de menciñas». Un beneficio ao que lle engade a repercusión que, a nivel económico, pode ter a súa investigación para Ribeira e a súa contorna: «Este fármaco pódese conseguir con especies de aquí coma o xurelo ou a sardiña».
Defender a súa tese doutoral con éxito e publicar varios artigos en revistas especializadas que xa ten cerrados son os obxectivos inmediatos de Breixo Ventoso, a quen non lle importaría que, no futuro, o seu estudo dera pé á comercialización de omega 3 en pastillas: «Claro que a produción sería interesante, pero iso xa depende da parte empresarial». Porque o que quere o ribeirense é ir máis alá, seguir investigando e ver se, cambiando as doses do ácido graxo, se pode influír tamén nos valores que provocan outras patoloxías: «Esta especie ten proteínas de moi fácil asimilación, polo que sería ideal ver a capacidade de rexeneración en pacientes que teñen por exemplo cancro ou unha anemia severa».