Houbo concentracións en Ribeira, A Pobra e Noia
17 mares 2018 . Actualizado ás 18:39 h.A medida que se suceden as concentracións, o movemento dos xubilados para esixir pensións dignas e protestar contra a subida do 0,25 % vai gañando adeptos, como se demostrou este mediodía nas mobilizacións convocadas en distintos puntos da comarca. Decenas de barbanceses saíron á rúa para apoiar as reivindicacións dos pensionistas.
En Ribeira, o punto de encontro foi a praza do Concello, onde, ademais de dar lectura a un manifesto, cedeuse o micrófono aos asistentes para que quen quixesen puidesen dar a súa opinión e trasladar as súas demandas. Houbo de todo, desde quen botou en falta unha maior participación dos mozos nas protestas ata quen lembrou cal é o día crave para que as cousas cambien: «O día que nos chamen a votar é o día que temos que dicirlles aos políticos o que pensamos».
Numerosa foi tamén a protesta celebrada na Pobra, onde, como xa fixeron a semana pasada, os manifestantes mesmo chegaron a cortar un carril de circulación da estrada comarcal AC-305. E en Noia, localidade na que todos os luns se celebran concentracións esixindo pensións dignas, a participación na protesta duplicouse e contou tamén coa presenza de numerosos veciños que aínda non chegaron á idade de xubilación: «É lóxico que se sumen, teñen que facelo porque eles van ser os máis afectados».