Representantes dos cinco concellos participaron en dúas mesas de traballo
18 feb 2020 . Actualizado ás 18:10 h.A mancomunidade Arousa Norte acaba de pór en marcha unha nova estratexia de traballo a través de mesas colaborativas para desenvolver actuacións conxuntas. Como novidade, a estes equipos de traballo incorporáronse representantes do Concello de Dodro para traballar coordinadamente nas accións de promoción do geodestino.
No que respecta a esta primeira xornada de mesas colaborativas, celebráronse dúas, unha entre os técnicos dos departamentos de Turismo e outra entre membros das concellarías de Deportes dos cinco concellos. Na primeira participaron Natalia Galbán, de Rianxo, Amalia López Louro (Boiro), Sandra Fernández (Ribeira), Anxos Tubío (A Pobra) e Elisabet Domínguez, axente de emprego do concello de Dodro.
En canto á mesa de Deportes, estiveron presentes o técnico de Rianxo, Moncho Villanustre, Miguel Ruiz e Javier Sampedro (Ribeira), Ana Romero (A Pobra), Manu González (Boiro) e o concelleiro de Dodro Abel Tarrío.
Traballo mancomunado
O obxectivo das mesas de traballo é establecer de forma coordinada e cohesionada unha estratexia conxunta entre as distintas áreas de traballo e a mancomunidade.
Neste sentido, Adolfo Muíños, que se sumou á primeira reunión como vicepresidente de Arousa Norte xunto á tenente de alcalde ribeirense Mariola Sampedro, destacou a importancia de actuar «de xeito mancomunado desde a perspectiva turística, deportiva e cultural. Este traballo colaborativo permitirá aos catro concellos acadar obxectivos máis amplos».