Colectivos veciñais de 16 municipios aúnan forzas para frear a instalación de parques eólicos no rural
OUTES
Os concellos que integran o colectivo son Outes, Mazaricos, A Baña, Samos, Negreira, Ponteceso, Carballo, Santa Comba, Coristanco, Ordes, Cerceda, Frades, Mesía, Oroso, Tordoia e Trazo
17 ene 2020 . Actualizado ás 05:00 h.Tras unha reunión que tivo lugar recentemente en Santiago de Compostela, plataformas veciñais pertencentes a 16 municipios decidiron unir as súas forzas coa finalidade de tal «traballar para asegurar un marco legal xusto e con garantías para que o rural non esmoreza», e como afirman desde a nova asociación.
Os concellos que integran o colectivo son Outes, Mazaricos, A Baña, Samos, Negreira, Ponteceso, Carballo, Santa Comba, Coristanco, Ordes, Cerceda, Frades, Mesía, Oroso, Tordoia e Trazo. Todos os concellos representados nesta nova entidade teñen unha forte contorna rural e están afectados por proxectos eólicos postos en marcha ou que se están tramitando ante a Administración.
O principal denominador común destas plataformas veciñais son os plans eólicos que, desde o seu punto de vista, consideran abusivos porque «poñen en risco a seguridade, a saúde e a economía das persoas que viven nesas zonas, ademais da afectación grave ao patrimonio natural, histórico e inmaterial, do impacto na paisaxe e a perda de superficie agraria e forestal», explica Jessica Rey , integrante da recentemente creada Rede Galega por un Rural Vivo.
Esta asociación denuncia o uso que se fai do medio rural como «polígono industrial», sen ter en conta as implicacións que parques como os proxectados en Outes ou Mazaricos poden ter sobre a poboación e a contorna, «condenando ao rural a un futuro moi incerto e a unha aceleración do despoboamento», comenta Rey .
Os colectivos veciñais que forman a Rede Galega por un Rural Vivo aseguran que non se opoñen á utilización de enerxías renovables, senón que a súa posición está en contra «un sistema de produción enerxética que concentra esta produción nunha comunidade, a galega, converténdoa nun territorio de sacrificio»de . Ademais, subliñan que este modelo produtivo empobrece aos territorios xeradores de electricidade, reducindo o crecemento potencial das áreas afectadas.
Visibilizar os problemas
As plataformas veciñais que conforman a entidade levan mantendo reunións desde hai máis dun mes para continuar definindo os obxectivos e plans de acción conxuntos que pretenden levar a cabo. Tal e como comenta Jessica Rey , a meta que se marcan é a visibilización dos problemas da contorna rural, así como conseguir un marco legal «que protexa a vida nestas zonas».
Entre as accións que expoñen levar a cabo desde a Rede Galega por un Rural Vivo figura o estudo doutras formas de produción de enerxía, como «o autoconsumo ou a produción de electricidade colectivizada para consumo local».
Desde o colectivo comentan que a constitución de colectivo que se acaba de materializar xa derivou na creación de grupos de traballo para levar a cabo o seu plan de acción. Así mesmo, Rey resalta que «estamos abertos a que se unan máis plataformas».