Roy Ellis, Tail Dragger, Adrián Costa e Mallou, entre os artistas que compoñen o cartel do Vilablues Fest
16 sep 2021 . Actualizado ás 14:03 h.O Vilablues Fes recala, por segundo ano consecutivo, en Noia e faino cun cartel que inclúe, segundo os seus promotores, a grandes lendas da música negra e a unha nutrida representación de artistas galegos. Os concertos terán lugar entre o 1 e o 3 de outubro, e os abonos xa están á venda a través da plataforma enterticket.
Entre os artistas que se deron a coñecer figura Roy Ellis, que chegará á vila medieval cunha banda formada por media ducia de músicos. Desde Estados Unidos tamén chegarán Tail Dragger, dono dunha das voces máis destacadas do blues de Chicago, e Shanna Waterstown.
A participación internacional complétase con Shirley David, considerada a nova diva europea do soul; co Combo Batanga e os seus sones de tradición cubana; e con Bimeni, que recalará acompañado de The Black Belts.
Esta edición do Vilablues contará tamén cunha ampla representación de artistas galegos, liderada por Adrián Costa, que ofrecerá un concerto en solitario. Por Noia tamén pasarán Espiño, Blues do País, Jay Doe & The Blues Preachers e Mallou, o novo proxecto dos boirenses Sabela Rey e Benxamín Vázquez.
Baixo o título Sempre Narf, o festival tamén lle renderá unha homenaxe ao músico compostelán, ao que se sumarán varios artistas invitados. Os organizadores tamén anunciaron que haberá actividades dirixidas ao público familiar. A maior parte dos concertos terán lugar no escenario principal situado no paseo marítimo, pero tamén haberá actuacións no Curro e no Liceo.
Distribución
O recinto principal estará parcelado e haberá espazos a niveis de chan e outros elevados, a modo de palco. Para os primeiros, os bonos de dúas entradas saíron á venda por 60 euros. No caso dos elevados, a cifra elévase aos 80 euros. Tamén se poden adquirir bonos individuais ao prezo de 30 euros.
A maiores, a organización lanzou 150 abonos individuais para a bancada, cuxo custo é de 25 euros. Os compradores poderán elixir tanto o formato como a localización do seu espazo.