Os noieses víronse excedidos polos de Almería, que foron máis contundentes
08 may 2021 . Actualizado ás 22:27 h.Duro castigo o que sufriu o Noia Portus Apostoli na tarde do sábado na pista del Ejido (8-1). A viaxe a Almería foi longo e o partido máis. Saíron os noieses como sempre, intentando presionar ao rival arriba para non deixalo respirar. Lluc tivo a primeira ocasión para os barbanceses, pero o seu disparo tocou nun defensa e foise a córner. No saque de esquina, Palmas atopouse o esférico no corazón da área, pero rematou frouxo e Jesús atrapou sen dificultade. Bo partido do gardameta do conxunto andaluz, que en varias ocasións evitou o gol dos noieses.
Os locais tamén crearon perigo nunha contra de Josema que se topou con Álex Pérez. Aos dous minutos, o propio Josema aproveitou unha xogada na que o equipo de Marlon Velasco non tivo moita fortuna para plantarse fronte a Álex Pérez e batelo por baixo.
Tocaba remar, aínda que o Portus Apostoli non parecía ter o día de cara á meta local. Influíu a inspiración de Jesús na portería. Só Rivera conseguiu marcar cando corría o minuto 14, pero xa no 15 volveu Nacho Gil a pór por diante no electrónico aos almerienses. Cun par de ocasións para cada un dos bandos chegouse ao tempo de descanso.
Do poste á goleada
A segunda parte comezou con El Ejido estrelando o coiro na madeira e acabou en goleada. Fran Cortés fixo o terceiro dos locais no minuto 27 ao finalizar un rápido contraataque. Por momentos, parecía que o Noia ía ser incapaz de anotar o segundo e no 31 comezouse a mascar a traxedia. Os barbanceses intentaban presionar a saída de balón dos andaluces, pero estes conseguiron combinar con rapidez e Josema enganchou un gran disparo raso e cruzado ante o que nada puido facer Álex Pérez.
Ao minuto caeu o quinto, obra de Cortés. Marlon Velasco xogoulla con Javaloy de porteiro-xogador e a aposta saíu mal. Dúas perdas e dúas tantos máis dos locais. Ambas desde a súa pista e a porta baleira. Aínda por riba, no último minuto Bustos puxo a puntilla desde os dez metros.
O Portus Apostoli perdeu unha batalla, pero non a guerra. O vindeiro sábado a pelota rodará no Agustín Mourís, un fortín no que se agarda empatar a eliminatoria e forzar o terceiro partido.