O derbi disputarase no Julio Mato Matito e os boirenses viaxarán ao campo do O Pino
09 may 2021 . Actualizado ás 05:00 h.A liga exprés que se deseñou este ano en Preferente está a chegar ao fin da súa primeira fase. Coa que se disputa hoxe, quedan tres xornadas e todo está por decidir. Encabezando a táboa está o Noia con 14 puntos e séguenlle Boiro e Puebla , ambos con 11 e os de Barraña con dous partidos menos a consecuencia dos choques que tiveron que ser aprazados cando o covid afectou ao persoal.
Noia e Puebla mídense hoxe, a partir das 17.30 horas, nunha auténtica final. Os noieses poden certificar a súa presenza na fase de ascenso cunha vitoria que, á súa vez, podería descolgar aos pobrenses da loita. Pola súa banda, se os branquiazuis asaltan o Julio Mato Matito apertarían moito as cousas na parte alta da clasificación.
Iván Carril, técnico do Noia, cualifica o encontro desta tarde como «moi importante» e lembra o disputado na primeira volta na Alta: «Tivemos ocasións para gañar ben e no 95 fóronsenos dous puntos de forma incrible». Como vén sendo habitual, afronta o partido con baixas pero coas ganas de, por fin, «sacar os tres puntos nun derbi, xa que as últimas referencias non son as mellores».
Pola súa banda, Anxo Casalderrey, adestrador do Puebla , ten claro que o seu equipo debe gañar para seguir «disputando os primeiros postos aos dous grandes da comarca». Para iso, hoxe toca «traballar e buscar as nosas oportunidades. O Noia ten un gran potencial técnico. Intentaremos quitarlle o balón para que ataquen o menos posible». Casalderrey non saberá ata o último momento se poderá contar con Pablo e con Teira.
Saída difícil
O Boiro desprázase ao difícil campo do Pino para, a partir das 17.00 horas, buscar a súa cuarta vitoria consecutiva. O técnico, Cristian Pérez, sinala que «debemos pensar só en nós e non nos demais. Temos un encontro moi complicado ante un equipo que vén de gañar 0-3 e ten opcións reais de meterse na fase».
Os de Barraña viaxan con ánimos e confianza, pero, como apunta Pérez, «non se pode caer no erro de que se vai vencer sen baixar do autobús».