Lidia Cacheiro Martínez foi localizada nunha leira da Picota, en bo estado
19 novs 2019 . Actualizado ás 17:47 h.A procura de Lidia Cacheiro Martínez, a veciña de 84 anos de Mazaricos que faltaba do seu domicilio desde as 7.30 horas xa concluíu. Dez horas despois de iniciarse o operativo, a muller foi localizada nunha leira da Picota, a un quilómetro escaso da súa vivenda, situada no lugar de Vilariño, na parroquia de Beba.
A muller estaba desorientada, pero en bo estado. Foi localizada apoiada nun muro e respondeu as preguntas que lle fixeron os equipos de urxencias. O dispositivo de procura estaba integrado por máis de medio centenar de persoas. Entre eles estaban veciños, catro patrullas da Garda Civil, unha do Seprona, o GES de Muros e Protección Civil de Mazaricos.
Lidia Cacheiro Martínez, que vive co seu irmán e a súa cuñada, foi operada da cadeira e anda con muletas. Debido ás súas dificultades para desprazarse, non é unha persoa que adoite ir camiñar nin saír en exceso de casa.