Investigan a unha veciña de Boiro por un posible delito de malos tratos animais
BOIRO
A Garda Civil retiroulle un can tras unha denuncia de Rueiros Barbanza
24 oct 2021 . Actualizado ás 05:00 h.A Garda Civil de Boiro investiga a unha veciña do municipio por un suposto delito de malos tratos animais. Á muller foille retirada unha cadela de raza pastor alemán tras unha denuncia presentada pola protectora Rueiros Barbanza.
Os feitos ocorreron o pasado luns, cando integrantes da protectora recibiron un vídeo no que se ve á muller cun pau, co que supostamente estaba a golpear ao animal. Ante esta situación, Rueiros Barbanza presentou unha denuncia no cuartel da Garda Civil de Boiro e os axentes acudiron á vivenda para levar ao animal.
O can foi levado a un veterinario para que examinase as feridas. Fontes de Rueiros Barbanza indicaron que inicialmente presentaba mostras de hinchazón no fuciño. Tamén subliñaron que, en principio, o can non mostra síntomas de estar mal alimentado.
Ata que se resolvan os feitos, o exemplar quedou baixo custodia de Rueiros Barbanza. Unha voluntaria encargouse de recollelo para levalo a un lugar de acollida.