A Pobra únese aos outros oito concellos da zona que levan unha semana sen novos casos
BOIRO
Só en Boiro e Carnota descubríronse positivos nas últimas xornadas
06 oct 2021 . Actualizado ás 20:51 h.Por primeira vez no que levamos de ano, nove concellos da comarca levan unha semana sen rexistrar ningún caso de covid. A última localidade en sumarse a esta lista foi A Pobra, despois de que non aparecesen máis contagios desde o 28 de setembro. Ademais, os dous enfermos que quedaban entre a súa poboación estaban a piques de recibir a alta.
Boiro e Carnota convértense así nos faroliños vermellos da comarca, posto que a aparición recente dun par de contagios provocou que aínda non teñan o seu marcador covid a cero nos últimos sete días.
Na área sanitaria de Santiago e Barbanza seguen descontándose enfermos e só quedan 79 pacientes con covid, dos que dez permanecen no CHUS (dous na unidade de críticos). Segundo o informe de Sanidade, déronse nove altas en 24 horas e só se rexistraron dous novos casos.
Hoxe tamén se deron a coñecer os datos dos contagios en centros educativos situados nos 46 concellos da zona de influencia da xerencia compostelá, que pasan de 37 a 22 en só unha semana. Ademais, as dúas aulas que se tiveron que pechar por un positivo xa reabriron as súas portas.