Hai baño máis aló das praias de Barbanza

As fervenzas son para moitas persoas uno das paisaxes máis bonitas que nos regala a natureza. A área de Barbanza alberga gran cantidade destes recunchos que, por maxia e encanto, espertan cada vez máis interese. Con todo, algunhas destas fervenzas seguen sendo aínda grandes descoñecidas para veciños e visitantes, e en parte débese á dificultade que existe para poder chegar ata elas, porque os accesos adoitan ser complicados e estar infestados de vexetación, e tamén falta unha correcta sinalización nos camiños. Ademais da posibilidade de gozar deste espectáculo de auga, moitas destas fervenzas convértense na mellor alternativa á praia, xa que algunhas forman pozas naturais nas que poder darse un mergullo. Non en todas está permitido nin é recomendable, porque a forte caída da auga e a falta de profundidade obrigan a extremar as precaucións.

 

Boiro

Accesible. Cunha caída de máis de 30 metros, a fervenza de Cadarnoxo salta varios chanzos e forma unha pequena piscina na que o mergullo é posible, aínda que non é o máis habitual. Ten unha gran vantaxe fronte a outras fervenzas da zona: a accesibilidade. Pódese chegar practicamente ata a caída en coche, o que facilita a súa visita. O interese que espertan as súas augas é cada vez maior entre a xente de distintas localidades.

  

Rianxo

Vexetación. O río Té forma un pequeno estanque de gran beleza natural que, ademais, conta coa súa propia lenda. Non destaca tanto pola altitude da caída, senón porque esta poza está completamente rodeada de vexetación e porque existe unha ruta de sendeirismo que se pode realizar seguindo o discurso da canle.

  

A Pobra

Pozas. As piscinas naturais do Pedras son as máis coñecidas, xa que o río pobrense debuxa un conxunto de pozas nas que o baño é case unha obrigación. Pero non é o único reclamo da zona, xa que na Misarela xúntanse as augas do San Xoán e do Barbanza, que forman ao seu paso unha sucesión de fervenzas separadas por rocas que moitos bañistas usan como tobogáns.

  

Mazaricos

Tres fervenzas. Son tres as fervenzas que podemos atopar a modo de ruta en Mazaricos. A máis coñecida, a de Nuveira, ten unha caída de nove metros e deriva nunha poza que os máis novos empezaron a usar como piscina natural. Un reclamo cada vez máis común pola beleza do lugar. É unha alternativa que non ofrece a de Chacín, duns dez metros de altura, onde a pesar de formarse tamén un estanque, a forza da caída da auga impide o baño. Para rematar, a fervenza de Locaia, caracterízase por ter dous saltos diferenciados. Está situada ao lado dunha ermida e convértese nun sitio idóneo para merendar en familia.

  

Ribeira

Acceso complicado. A fervenza de San Amedio, en Ribeira, crea unha poza que ofrece a posibilidade de bañarse, pero é das máis escondidas do Barbanza. A pesar de haber dous accesos dispoñibles, a vexetación é moi agreste, o que dificulta o camiño se non se coñece o lugar.

 

Porto do Son

Riqueza paisaxística. A fervenza de Ribasieira, en Río Sieira, é unha das máis importantes da zona. Goza dun miradoiro que permite ter unha visión desde arriba da fervenza desde unha altura de dez metros. Na parte inferior, á que se chega a través dun carreiro, a paisaxe é completamente diferente. Ademais, deseñouse unha ruta de sendeirismo paralela duns 12 quilómetros de percorrido

  

Lousame

Rodeada de historia. Un paseo entre carballos que rodean o mosteiro de Toxosoutos leva á ponte que cruza o río de San Xusto. Monte, pedra, historia, saltos de auga e pozas conducen ata o reclamo principal do lugar, a fervenza, con máis de cinco metros de caída.

---

---

---