BTT Un centenar de ciclistas disputaron a segunda edición da ruta boirense
14 oct 2019 . Actualizado ás 05:00 h.A comarca non teme aos temporais e menos cando a ameaza queda en dúas gotas. Precisamente, iso demostrou o centenar de participantes da segunda edición da Ruta BTT Terras de Barbantia, que patrocina a firma Jealsa Rianxeira, e que onte coroou aos seus novos campións, Ramón García (RS Bike Boiro) e Silvia Blanco .
García, que logrou un tempo de 02:19:56,76 e unha velocidade media de 18 quilómetros por hora, impúxose a Claudino Mirón Agra (CPC Toxo) que se colgou a prata a menos dun segundo. O terceiro caixón do podio masculino pertenceulle a Bernabé Lojo de Río (Corbelo), a catro segundos do primeiro.
O certo é que a pesar de que as condicións meteorolóxicas non eran as mellores, o pelotón puido gozar dunha gran mañá e do esixente, e á vez, belo circuíto que discorreu por algún dos espazos naturais máis atractivos do municipio, como a serra de Barbanza. En total, os ciclistas enfrontáronse a un trazado de 42 quilómetros.
Os equipos
Entre os conxuntos que estiveron representados a través dos dorsais dos inscritos destacou a Pena Cicloturista Castro Barbudo, a máis numerosa, pero tamén o RS Bike Boiro, así como os de Ricardo Ribeiro coas cores do Club Ciclista Barbanza e os lousamianos do Club Ciclista BTT O Treito, ademais dun dos colectivos da comarca que nunca falla, trátese de calquera disciplina deportiva, o Artrogal Tri-498.
O concelleiro de Deportes de Boiro, Marcos Fajardo, foi o encargado de dar o pistoletazo de saída a esta proba organizada por Barbantia Roda e o Concello. Tras preto de catro horas de percorrido, o acto de entrega de premios estivo repleto de sorpresas que desencadearon os seus correspondentes sorrisos, a través dos sorteos dos distintos obsequios.
Entre os agasallos que se repartiron os participantes sobresaíron carros da compra por valor de 100 euros, tanto en Gadis como en Froiz, unha noite en parella nas románticas Cabanas do Barranco de Outes ou a dobre velada para dous na aldea rural Os Muíños de Rianxo.