Jaime Arjones e Martín Casais son os últimos xogadores do Jealsa Boiro que integrarán a selección nacional
07 ago 2019 . Actualizado ás 23:14 h.Talento innato, condicións físicas inmellorables, intelixencia e sacrificio. Esas son as características que levaron a Jaime Arjones (Boiro, 2003) e Martín Casais (Boiro, 2005) a relacionarse cos mellores xogadores de Europa. Cincelados na canteira do Jealsa Boiro, os adolescente foron chamados pola federación nacional para que pasen a formar parte da concentración permanente da selección española.
Recalarán no centro de alto rendemento de Palencia o 15 de setembro. Deixarán Boiro para vivir, adestrar e estudar na cidade castellanoleonesa. «É un reto, unha nova experiencia e unha oportunidade para crecer no deporte», afirma Arjones. En termos similares exprésase Casais: «Quero chegar a conseguir logros importantes».
Tras alzarse campións de España e formar parte do combinado nacional no torneo oito nacións disputado en Italia este mesmo verán, os responsables da federación tiñan claro que debían dar o paso e chamalos para que se forxen e formen cos mellores da súa idade. «Teñen unhas condicións espectaculares», afirma o adestrador de ambos durante estes últimos catro anos, Adrián Alves.
Sobre Jaime Arjones, o técnico ten claro que «da súa idade é o mellor colocador de España. Leva tres anos consecutivos acadando o premio ao mellor xogador a nivel nacional. Ten capacidade de traballo, talento para colocar, fisicamente mellorou moito neste último ano e ademais academicamente é brillante. É fácil que convenza aos técnicos».
Outro fenómeno
Alves non dubida en desfacerse tamén en eloxios cara a Casais. «Ten unhas condicións antropométricas espectaculares. Mide 1,91 sendo infantil de segundo ano; xa te podes imaxinar. A pesar de ser moi alto, é coordinado e tecnicamente bo. É un rapaz que pode xogar en varias posicións, tanto de receptor como de oposto e ademais con moita capacidade de traballo. Nel estaban postos moitos ollos. Do 2005 hai poucos coma el».
Aínda que aínda se atopen en etapa formativa, xa tiñan oco no Rotogal Boiro de Superliga 2. Este revés en cambio non preocupa á directiva, que entende que os mozos teñen que voar lonxe de casa para que sigan mellorando. «Para nós é un orgullo. Oxalá nun futuro teñamos a capacidade de traelos de volta. Sabemos que é complicado, pero estamos traballando para que sigan saíndo rapaces deste nivel. Son un exemplo para o resto», afirma Alves.
Ambos tiveron dúbidas ao recibir a noticia, pero non quixeron deixar pasar o tren. «Xa coñecemos a case todos os compañeiros que teremos en Palencia e ademais tamén vén Martín», recoñece Arjones. Casais destaca que «ao principio sentín nerviosismo, pero xa teño ganas de empezar».
A pesar da chamada nacional, os mozos poderán seguir xogando co Jealsa Boiro as fases finais do Campionato Galego e do torneo estatal. «Van a ter ficha con nós, necesitámolos. Aínda que non poderemos contar con eles nas fases regulares, serán un reforzo fundamental se nos clasificamos», recoñeceu Alves. Con ambos, sabe que volverán estar entre os mellores do país. Por algo España chamou ás portas da Cachada.