Os avogados de Barbanza celebraron a festividade da súa patroa coa vista posta na renovación da súa directiva

Como cada mes de novembro, os avogados da comarca volveron compartir mesa e mantel para celebrar a festividade da súa patroa, A nosa Señora do Patrocinio; unha cita que tivo como escenario o restaurante A de Maris de Ribeira, e á que ademais dos letrados tamén estaban invitados representantes municipais e das forzas da orde dos concellos de Boiro, Ribeira e A Pobra, así como notarios e xuíces que traballan en Barbanza.

Ao encontro tamén asistiu o decano do Colexio Oficial de Avogados da Coruña, Augusto Pérez-Cepeda, que quixo arroupar aos membros da delegación barbancesa que preside desde o ano 2021 María Briones e que está formada ademais por Manuel Alfonsín (secretario), Pablo Ferreirós (tesoureiro), e Paula Puente (vogal), aínda que esta última non puido asistir ao encontro por motivos persoais.

Os tres representantes do colexio na comarca foron os encargados de tomar a palabra e falar un pouco do traballo realizado neste mandato e de todos os retos aos que se enfrontan os avogados de Barbanza e do resto de partidos xudiciais da provincia, sobre todo coa vista posta na creación do xulgado único de violencia de xénero en Santiago.

Para rematar, explicaron que proximamente se celebrarán eleccións para renovar aos responsables desta delegación do Colexio Oficial de Avogados da Coruña e que decidiron facerse ao carón e non volver presentarse. Por este motivo, animaron a outros compañeiros para coller a substitución, posto que consideran que é necesario seguir traballando para loitar polos dereitos dos profesionais e dos seus clientes.

---

---

---