Boiro, Noia, Outes e Rianxo contan con renovados locais de lecer nocturno
01 dic 2021 . Actualizado ás 05:00 h.Talvez non llo agardaba ninguén, pero una das reaccións aos case dous anos transcorridos desde a pandemia que axitou a vida en todo o planeta está sendo a reactivación do lecer nocturno. As restricións de fai uns poucos meses han dado paso a un novo bum da noite, algo que en Barbanza se traduce na reapertura de locais que, en moitos casos, levaban anos pechados. E isto, a pesar da ameaza dunha nova onda de contagios e das restricións que adoitan levar aparellados os repuntes nos casos de covid. As ganas de retomar a vida social tras os duros meses nos que o contacto con non convivientes estaba limitado e a hostalería pechada, o acortamiento de horarios en bares e restaurantes e a escasa oferta de negocios para as horas da madrugada son as explicacións que atopa o sector a este fenómeno.
Boiro, talvez por tradición, está recuperando a súa posición como epicentro da movida barbancesa. A localidade conta coa cifra máis elevada de licenzas de lecer e iso facilita o rexurdir da actividade nocturna, de maneira que, aos locais que reabriron as súas portas nas últimas semanas, sumarase en breve algún máis que está a se reformar, algo que hostaleiros como Suso Santamaría consideran «necesario» ante o aumento da clientela: «Houbo unha explosión tralo covid e non hai locais, varreunos todos a pandemia. Oxalá abriran máis, pero é complicado, é mal momento para facer o investimento que necesita un local que leva tempo pechado cando non sabes se vai funcionar».
Recoñece non atopar explicar ao crecente rexurdir da movida: «Antes do covid xa estabamos aquí e non había tanta xente». Pero outros profesionais do sector creen que a causa está, precisamente, na pandemia. Domingo Lago acaba de inaugurar unha discoteca en Outes, BBT: «Estivemos moito tempo pechados e a xente ten ganas de saír e airearse».
Establecementos pechados
Lago asegura que a primeira fin de semana en funcionamento foi «unha tolemia», pola afluencia de clientela e porque non todo o mundo cumpre as normas como debese: «É moi difícil controlar todo, e o que pasa é que agora hai moito local pechado, a xente ten medo a abrir». Con todo, está satisfeito do paso que deu para cubrir unha demanda crecente: «Non había a onde ir, vas de cea e ao saír está todo pechado, non hai marxe de manobra».
Este argumento utilízao tamén Tonecho, que ultima a apertura dun pub en Rianxo, outra das localidades nas que o lecer nocturno está a recuperar espazos. Na vila rianxeira quedan poucos negocios con licenza para abrir durante a madrugada, polo que decidiu apostar por un pequeno local en Tanxil: «Hai un perfil de xente que quere quedar no pobo, non lle apetece moverse a outros sitios, pero ao final acaba marchando porque aquí non hai nada. A mocidade que tiñamos no verán marchou toda para Boiro porque alí hai locais que abren ata máis tarde».
Fai seis anos que rexenta un bar na vila e recoñece que os hábitos da clientela cambiaron co covid. Aínda así, cre que «a xente quere saír, recuperar a vida anterior, polo menos as fins de semana». Sobre o futuro, móstrase optimista: «O que demostrou a pandemia é que a xente quere quedar no pobo se ten alternativa e non ter que coller o coche, e creo que dous anos de ocio nocturno ímolos ter».
Ribeira é outro dos concellos nos que, aínda que a contagotas, está a retomarse o lecer nocturno e nas últimas semanas conta cun novo establecemento, mentres que tamén en Noia se percibe unha reactivación da movida, que vai acompañada da posta en funcionamento de novos negocios que favorecen unha maior afluencia de público chegado mesmo doutros municipios, e especialmente entre os máis novos.
Esta crecente actividade non está exenta dalgúns inconvenientes, asociados principalmente aos botellóns, como explicaba o alcalde noiés, aínda que, salvo problemas de vandalismo puntuais, non se rexistran grandes problemas e o rexedor confía en que siga sendo así: «Dende o Concello procuramos facer un labor de concienciación para que se cumpran as normas dentro dos establecementos».