Dous accidentes recentes reactivaron a demanda de traspaso do viario á Xunta
13 novs 2021 . Actualizado ás 05:00 h.Pasan os anos e o viario provincial que une Caldas de Reis con Catoira e funciona como ligazón principal da comarca de Barbanza coa AP-9, segue sumando accidente tras accidente, ata o punto de que se converteu nunha pataca quente que as Administracións implicadas pásanse entre si e ninguén quere. Os dous últimos accidentes mortais no viario, o máis recente o pasado outubro, no que perdeu a vida unha muller, reabriron o debate e reactivado a demanda de traspaso da estrada á Xunta de Galicia.
A petición non é nova, nin moito menos, e volve polos seus foros cada vez que se rexistra un sinistro grave no trazado. Hai unhas semanas a Deputación de Pontevedra tomaba cartas no asunto e, tras máis dunha década de xestións improdutivas, enviaba ao presidente da Xunta e á conselleira de Infraestruturas e Mobilidade unha carta na que solicitaba a reactivación do proceso de transferencia da estrada á Administración autonómica, como primeiro paso para a súa conversión nunha vía de alta capacidade. Desde o entre provincial coruñés non se deu un paso similar aínda, pero a reclamación segue intacta.
Fontes da Deputación a este lado do río Ulla insisten na importancia estratéxica que ten un viario que non só vertebra dúas comarcas, Barbanza e O Salnés, senón que é unha vía fundamental para as comunicacións por estrada entre o norte e o sur de Galicia: «É un absurdo que haxa tantas Administracións implicadas nunha estrada que é estratéxica en canto que vertebra dúas provincias. A nosa posición segue sendo a mesma, a de demandar á Xunta que esta vía pase a depender da Administración autonómica». Neste sentido, lembraron que no 2016 ambas as deputacións reclamaron ao Executivo galego que fixese efectivo o traspaso: «Reiteramos a proposta que está encima da mesa da Xunta desde hai cinco anos sen resposta».
Máis dunha década
Aínda que desde o ente que preside Valentín González Formoso remóntanse ao 2016, o certo é que a demanda vén de moito antes. Fai once anos, un acordo entre a antiga Consellería de Medio Ambiente, Territorio e Infraestruturas e a Deputación de Pontevedra, entón comandadas polos populares Agustín Hernández e Rafael Louzán, sentaba as bases dunha comisión de seguimento para levar a cabo a cesión da EP-8001.
É máis, antes diso, o viario xa figuraba entre as actuacións previstas pola consellería dentro do Plan Move, no que foi incluída no 2009, como lembraba o alcalde de Rianxo , Adolfo Muíños: «Non estamos inventando nada nin propoñendo algo distinto ao que o propio Goberno galego recollía no seu plan». O rexedor está convencido ademais de que «ten que ser así porque estamos a falar dun eixo vertebrador, xa non de dúas comarcas, senón de dúas provincias. Os que non pintamos nada somos os concellos, que somos os que padecemos as consecuencias de que haxa unha estrada dividida en cachiños que pertencen a distintas Administracións».
Neste sentido, Muíños lembrou que son os concellos de Rianxo e Catoira os que asumen a iluminación da ponte que cruza o río Ulla: «Non ten sentido».
Con todo, o mandatario rianxeiro apunta que é ás deputacións ás que lles corresponde capitanear esta reclamación tendo en conta que son quen teñen a titularidade do trazado. Desde a coruñesa, indican que insistirán nesta petición sen rehuir outras cuestións: «A Deputación non elude a súa responsabilidade sobre a vía no caso de que fora preciso facer melloras ou investimentos nela antes da transferencia, pero é unha estrada estratéxica e debe ser da Xunta de Galicia».
No Parlamento
Por outra banda, a través da deputada pobrense Rosana Pérez, o BNG prevé trasladar esta cuestión ao Parlamento galego instando a Xunta a que asuma a titularidade da estrada.
Aos argumentos xa esgrimidos, a Deputación de Pontevedra engade un máis: a elevada densidade do tráfico, tamén pesado, que soporta un trazado que para Barbanza é fundamental para as comunicacións co sur dado que é a ligazón natural coa AP-9. De aí a petición formulada a ambos os dous lados da ría por políticos e empresarios para que a estrada se transforme nunha vía de alta capacidade que enlace a AG-11 coa autoestrada.
