A formación sinala que un dos aeroxeradores está a menos de 500 metros das casas
17 sep 2021 . Actualizado ás 13:23 h.Co obxectivo de paralizar «o forte impacto sobre as vivendas» dos núcleos de Vilardante e Vilafabeiro, o BNG de Noia presentou alegacións ao proxecto do parque eólico Furacán, que prevé a instalación de aeroxeradores nas proximidades. O portavoz do grupo municipal nacionalista, Ricardo Suárez, informou os veciños do contido da súa proposta e púxoa a disposición de quen queiran rexistrala.
Son tres os aspectos nos que inciden as alegacións. Por unha banda, o BNG apunta que o parque non coincide na totalidade das súas posicións coas áreas de desenvolvemento eólico que recolle o Plan Sectorial de Galicia. En segundo lugar, o aeroxerador número uno, previsto en Noia, incumpre a normativa xa que se sitúa «a menos de 500 metros do núcleo rural histórico de Vilardante, delimitado tanto polas normas subsidiarias vixentes como polo plan xeral pendente de aprobar». Para rematar, o proxecto do parque establece unha zona de risco ou incidencia dentro da cal calquera elemento patrimonial resulta afectado, polo que os nacionalistas non entenden que sexa legal que esa franxa coincida coa área de cautela dun ben catalogado como é o denominado Castelo Miúdo.
Por outra banda, Ricardo Suárez tamén criticou que o Concello «non mostrara ningún interese por informar nin asesorar á veciñanza máis afectada» polo proxecto, e explicou que o luns porán as súas alegacións a disposición do equipo de goberno «para que se poidan presentar como parte interesada no proceso e defendan a calidade de vida en Vilardante e Vilafabeiro».