Choiva de protestas por ruídos nocturnos na rúa e vandalismo

Viviron os barbanceses que residen nas zonas de movida das diferentes localidades un período de tregua durante o confinamento e os meses posteriores, dominados polas restritivas limitacións. A conclusión do toque de queda, en maio, foi a orixe dunha tormenta perfecta que devolveu a estes veciños a unha realidade que tiñan esquecida. A ansias de diversión dos mozos, a chegada de turistas e a apertura a contagotas do lecer nocturno propiciaron un escenario ideal para as aglomeracións de persoas nas rúas e con elas regresaron as denuncias por ruídos e actos de vandalismo . E o problema, segundo sinalan desde diferentes policías locais, non ten doado solución.

Unha das zonas máis castigadas é o barrio de Bandourrío, en Ribeira . Xa antes da irrupción da pandemia, os veciños viñan queixando, pero nos últimos tempos, as protestas habíanse apagado, a medida que diminuían os negocios englobados na chamada movida nocturna e, polo tanto, a afluencia de xente. Estas regresaron cando se impuxo a nova normalidade, chegando a rexistrar picos de ata 80 chamadas á Policía Local nunha soa fin de semana, puntos álxidos que coincidiron con sucesos vandálicos de relevancia, como as desfeitas, rodas coiteladas incluídas, que sufriron varios vehículos.

Máis aló de evitar esta problemática social, as últimas restricións incrementárona. A escaseza de locais, aínda no curto período de tempo que se permitiu o lecer nocturno, e os límites horarios levan aos noctámbulos a invadir rúas e prazas, sen que a Policía Local conte con medios suficientes para actuar. «Tiñamos unha patrulla activa os fins de semana e xa a reforzamos con outra, pero os grupos que se forman son moi numerosos e non podemos facer moito», explicou o responsable do corpo, José Manuel Bretal.

Engadiu que se actúa, a modo disuasorio, nos lugares predilectos para os botellóns, como o parque Pedra Pateira: «Intensificamos a vixilancia a primeira hora, porque se despois se xuntan 200 ou 300 persoas xa non podemos facer nada». Pero o problema trasládase ao exterior dos locais hostaleiros, sobre todo unha vez que estes pechan as súas portas.

A situación é moi similar na localidade de Noia , onde cada fin# de semana se rexistran varias chamadas á Policía Local de veciños que se queixan polo ruído e pola existencia de nutridos grupos de persoas incumprindo a normativa de distancia e máscara. Tamén neste caso, a falta de axentes limita as actuacións: «Que pode facer unha patrulla diante dunha concentración de máis dun cento de persoas?», pregúntase un dos profesionais.

Botellón en Barro

A iso súmase a proliferación de botellóns, a saída que moitos ven á falta de locais de movida. Un dos puntos máis sensibles son as pistas deportivas de Barro, onde é doado que se xunten un centenar de mozos: «Marchan cando nos ven chegar, pero ao pouco volven, e así toda a noite». Tampouco desde a Policía Local ven doado pórlle solución á problemática: «Son poucos os locais de ocio nocturno que se deciden a abrir e a xente que sae de marcha, ao non ter onde meterse, queda na rúa».

O ruído que se forma na rúa debido á aglomeración de persoas no exterior dos establecementos trae de cabeza tamén a un bo número de boirenses, que así llo transmitiron á Policía Local en forma de queixas. A rúa peonil, Pablo Iglesias e a praza da Mancomunidade son os puntos máis conflitivos.

Nalgunha que outra ocasión, esas longas noites de movida remataron con danos no mobiliario urbano. Macetas e farois son os principais obxectos de desexo dos vándalos que pisan territorio boirense.

 

«Queremos máis presenza policial e coordinación entre as forzas de seguridade»

Moitos anos levan os veciños de Bandourrío queixándose das consecuencias da movida, que sofren en forma de ruídos, actos de vandalismo e sucidade nas rúas. Tras a tregua do confinamento e o toque de queda, os problemas, segundo din, recruáronse, debido á xente que se aglomera no exterior dos locais. Para eles, o peor é que cada vez que piden axuda reciben a mesma resposta: «Cando chamamos á Policía Local sempre nos din que non teñen persoal para enviarnos», denuncia o presidente da asociación de veciños, José Ramón Otero.

 Tal é a situación, que os veciños deste barrio ribeirense concentráronse hai uns días na praza do concello. Esixen a adopción de medidas de forma urxente: «Queremos máis presenza policial e coordinación entre as forzas de seguridade, para que cando non poida actuar a Policía Local o faga a Nacional», apunta José Ramón Otero.

---

---

---