Traballo público, transporte e sector servizos xeran a metade do emprego en Barbanza

A pandemia segue marcando o día a día aínda coa vacinación xa avanzada, pero a vida continúa e unha gran preocupación segue sendo o emprego. A crise sanitaria tivo o seu impacto na economía e aínda está por ver se a repercusión será maior. Aínda así, o mercado laboral en Barbanza dá signos de recuperación, grazas en boa medida á época estival, aínda que a entrada de novas restricións na hostalería non facilita as cousas. Os datos da Seguridade Social a finais de xuño indican que a zona contaba cun total 28.381 afiliados, case dous miles máis que durante o mesmo período do ano pasado. Deses, en torno ao 50 % dedícanse ao sector servizos, ao transporte ou traballan para a Administración.

Desde o inicio da pasada década ata a actualidade houbo un cambio de tendencia no que respecta ao mercado laboral, segundo os últimos datos publicados polo Instituto Galego de Estatística. Tras o estalido da crise do ladrillo, a construción foi perdendo terreo, aínda que agora estea á alza, para ir gañando peso o comercio, o transporte e a hostalería.

En Boiro e Muros, por exemplo, os traballadores desta área supoñen case o 30 % do total de afiliados á Seguridade Social e en Ribeira e Noia superan esta porcentaxe. Tamén é maior en Carnota , un municipio que experimentou nos últimos anos un crecemento considerable a nivel turístico.

Que sectores como a hostalería seguen tendo tirón a pesar da situación actual demóstrao que antes do comezo da tempada estival anunciáronse numerosas ofertas de traballo, aínda que os propietarios dos establecementos indicaban que faltaba persoal cualificado.

Mesmo se seguen impulsando negocios que xeran empregos. En Boiro, Guillermo Simarro abriu o pasado mes A Terraza do Furancho, dando continuidade así ao local que en Ribeira ofrece comida para levar e a domicilio. Supuxo, como o mesmo afirma, a contratación de sete persoas que se suman ás catro do Furancho da capital barbancesa e ás dúas que atenden a xeadería situada a escasos metros.

Simarro explica que, para el, a pandemia foi unha oportunidade: «Iamos ben, pero agora a xente está máis acostumada a este servizo tras a irrupción do covid, que precipitou a explosión da comida para levar». No local boirense, ademais, instalou unha terraza para que os clientes poidan degustar alí os pratos.

Máis do 20 %

As Administracións públicas, Educación, Sanidade e outros servizos están en segunda posición da lista por número de persoas que empregan. Nos últimos anos a porcentaxe foi en aumento e en municipios como Carnota, Muros, A Pobra, Porto so Son, Ribeira e Noia supera o 20 %, no noiés mesmo se aproxima ao 30 %. Con todo en Mazaricos é tan só do 10 %, pero esta localidade ten a peculiaridade de que case catro de cada dez afiliados á Seguridade Social enmárcanse na categoría de agricultura, gandería e silvicultura.

Para completar o podio hai que diferenciar por concellos, xa que a terceira actividade con máis traballadores é a pesca e a acuicultura en Boiro, Muros, Noia, Outes, Porto do Son e Ribeira, algo de agardar, mentres que en Carnota e Lousame é a construción. Na Pobra é a industria agroalimentaria.

Precisamente, o sector do ladrillo foi o que acusou un maior descenso desde o inicio da pasada década, aínda que hai excepcións. A porcentaxe en Muros creceu un par de puntos e nos municipios carnotán e lousamiano mantivo o tipo. Iso si, nas boas épocas da construción levantáronse un bo número de inmobles, o que motivou un incremento das actividades relacionadas co ámbito inmobiliario moitas localidades.

«Enviei currículos a todos lados. A estas alturas xa o daba por imposible»

O sector servizos foi o que deu traballo a Alba Pérez e Laura Sieira, dous ribeirenses que buscaban emprego para a tempada estival. Alba comenta que xa o ano pasado estivo nun pizzería «por casualidade», que deixou polas condicións. Nesta ocasión decidiu enviar o seu currículo a comercios, tendas de alimentación e a ofertas que ía coñecendo. Ao final atopou o seu posto no establecemento que Bico do Xeado acaba de abrir na capital barbancesa: «Tiven sorte. Fixéronme a entrevista, pasei a proba e xa comecei. En principio tres meses con opción a seguir». Ela compatibiliza o seu traballo con estudar unha oposición.

Laura Sieira será a súa compañeira. Onte foi o seu primeiro día e comentaba: «Enviei currículos a todos lados. A estas alturas xa o daba por imposible». Probou sorte no ámbito relacionado cos seus estudos, cursa Maxisterio en Educación Infantil, e estivo a piques de tela, pero quedou ás portas. «Despois non me chamaban para nada e estaba frustrada», indica, tras comentar que empezou a buscar traballo ao acabar os exames en maio.

---

---

---