As altas de cinco enfermos rebaixan a 18 os casos en centros educativos de Barbanza

Despois dunha semana de ascenso de positivos nos centros educativos de Barbanza, por fin onte chegou unha boa noticia, posto que xa recibiron a alta cinco enfermos, o que rebaixa o número de contaxiados a 18. Segundo os últimos datos, borráronse da lista da Consellería de Educación -elaborada cos informes que lle facilita Sanidade- a persoa con covid que había no IES Praia de Barraña do Boiro, o rexistrado no Cernadas de Castro de Lousame, os dous do Felipe de Castro, e un do Virxe do Mar de Noia, onde permanece activo un caso.

Onde non houbo cambios é na Pobra e Ribeira, que manteñen sete contaxiados cada concello vinculados a instalacións docentes. Ademais, no municipio ribeirense, o colexio de Palmeira continúa con dúas aulas pechadas despois de que se detectaron cinco positivos. Tamén hai un enfermo no instituto Espiñeira de Boiro, outro no centro de secundaria de Porto do Son e un no Brea Segade de Rianxo.

No conxunto da área sanitaria de Santiago e Barbanza hai contabilizados 67 casos vinculados a centros educativos e que se inclúen dentro dos 376 totais que onte notificou Sanidade, tres menos que no último informe. A boa noticia é que tamén diminuíu a presión asistencial, pasando de 29 a 24 persoas no CHUS. Delas, 21 atópanse en planta e tres permanecen na uci.

---

---

---