Febreiro pechouse cunha cifra de desempregados similar á de xaneiro, ao redor de 6.300, o 66 % deles do sector servizos
03 mares 2021 . Actualizado ás 05:00 h.Se hai un dato que pode axudar aos cidadáns a facerse unha idea das consecuencias da pandemia, ese é o relativo ao desemprego. No caso dos 11 municipios que integran o ámbito de influencia desta edición, o número de parados era ao peche de febreiro do 2020, cando o coronavirus estaba a piques de irromper, pero aínda non motivara a adopción de restricións, de 5.827 persoas. O informe que onte facía público a Consellería de Emprego sitúa en 6.317 a cifra de barbanceses que buscan traballo. E hai que ter en conta que os profesionais que se atopan en ERTE non figuran nesta relación.
A comparativa con respecto ao mes anterior tamén guinda un resultado negativo en Barbanza, aínda que menos acusado. Xaneiro acabou na comarca con 6.303 desempregados, mentres que febreiro o fixo con 14 máis. É certo que este incremento rompe a tendencia á baixa que se rexistrou entón, cando medio milleiro de barbanceses conseguiran emprego co arranque do novo ano.
O maior incremento
A análise dos datos por concellos revela que non hai cambios significativos. O aumento máis importante de demandantes de emprego rexistrouse en Ribeira , con 27 parados máis, mentres que Rianxo se sitúa no lado oposto da balanza, ao descontar 28 desempregados. Na maior parte dos municipios, as oscilacións son mínimas.
Como adoita ser habitual, o sector servizos é o que concentra a maioría dos parados na zona. Do total de desempregados cos que finalizou febreiro, o 66 % pertencen a este ámbito, é dicir, 4.211 persoas. Esta cifra é sensiblemente inferior á que se rexistraba hai un mes, cando eran 4.382 os barbanceses que buscaban traballo no sector servizos. Por concellos, Ribeira lidera o ránking neste ámbito, con 1.128, seguido de Boiro, con 649 e de Noia, con 578.
O segundo sector que concentra a un maior número de desempregados en Barbanza é o da industria. Segundo o informe da Consellería de Emprego, son 836 os veciños da zona que están a buscar traballo neste ámbito. En terceiro lugar sitúase a construción, con 534 demandantes de empregos e para rematar estaría a agricultura, onde son 366 as persoas interesadas en atopar ocupación. O resto dos parados correspóndense con veciños que non desempeñaron traballo con anterioridade.
Os DATOS
Municipio Parados
Ribeira 1.563 (+27)
Boiro 1.007 (+18)
Noia 803 (+3)
Rianxo 646 (-28)
Muros 515 (+19)
A Pobra 507 (-20)
Porto do Son 440 (-6)
Outes 293 (+13)
Carnota 233 (-11)
Mazaricos 171 (+5)
Lousame 139 (-6)