O BNG, disposto a levar ao Parlamento a mellora da ligazón de Barbanza coa AP-9
BARBANZA
A deputada Rosana Pérez considera que as comunicacións son «pésimas» e que se necesita vontade política para acometelas
27 ene 2021 . Actualizado ás 05:00 h.Cando no 2008 redobrouse a presión por parte das forzas sociais de Barbanza para conseguir a mellora das infraestruturas viarias que vertebran a comarca e que a enlazan co sur de Galicia, todas as forzas políticas se sumaron á petición, apoiárona e expuxérona en distintos foros, desde plenos municipais ao Parlamento galego. A deputada do BNG Rosana Pérez recoñece que así foi, e que logo veu un longo silencio ao que o seu grupo está disposto a pór fin volvendo expor no pazo do Hórreo a mellora das conexións de Barbanza e Muros-Noia coa AP-9.
«Esta cuestión estivo uns meses nas propostas de todos e logo abandonouse un pouco, porque en cuestións de infraestruturas todo é un pouco unha desidia, sobre todo cando hai distintas Administracións implicadas», recoñecía a deputada barbancesa, que non cuestiona a necesidade de que se acometa dunha vez por todas a mellora das comunicacións tanto coa AP-9 como entre as rías de Arousa e Muros-Noia: «É obvio que con Noia, a pesar de estar ao lado, estamos fatalmente comunicados, e coa AP-9 o mesmo. A maioría da xente optamos por ir ata Padrón para coller a autoestrada cara Pontevedra».
Ante esta circunstancia, Rosana Pérez móstrase partidaria de retomar o debate político ao redor da necesidade de actuar na estrada provincial que une a desembocadura da autovía de Barbanza na ponte de Catoira coa ligazón da AP-9 en Caldas e no viario que comunica os municipios de Noia e Boiro porque «as conexións son pésimas».
Trazado perigoso
No que respecta á ligazón coa autoestrada en Caldas, recoñece que o actual viario provincial non é o máis adecuado para unir dúas provincias e dúas vías de alta capacidade: «Esa estrada ata Carracedo é perigosa todo o ano, pero no inverno máis. Non anima en absoluto a circular por ela e convida a ir ata Padrón para coller a AP-9, aínda que haxa que dar un rodeo, porque pola autovía é moito máis cómodo».
De feito, considera que, cunha estrada máis «circulable» incrementaríase o tráfico por ese trazado, que é a saída natural da comarca cara ao sur.
Con todo, Rosana Pérez pon mesmo máis énfase en defender a necesidade de que se actúe na estrada provincial entre Boiro e Noia, a DP-1105, pola súa importancia para vertebrar as dúas rías: «Para acceder á autoestrada aínda temos a opción do enlace de Padrón, pero non temos unha comunicación axeitada con Noia. Son dúas comarcas que están ao lado e están totalmente illadas unha da outra».
Por iso, insiste en que o BNG está disposto a levar unha proposta neste sentido ao Parlamento galego, aínda que a pelota está no tellado da Administración autonómica: «Nós podemos propoñelo, pero vai depender de que a Xunta teña vontade e presuposto para facelo, e neste caso atreveríame a dicir que o presuposto é o menor problema. Se realmente existe vontade política para facer estas melloras, o financiamento búscase, pero o primeiro que hai que facer é sentarse a falar coas deputacións para a transferencia desas estradas. E dá a impresión de que non existe moita vontade».
