Boiro sobe ao nivel 2 de alerta nunha xornada na que se superan os mil casos de covid na área sanitaria
BARBANZA
As probas PCR permitiron detectar 118 novos positivos nas últimas horas
24 oct 2020 . Actualizado ás 21:18 h.En sintonía co que ocorre no resto do país, o balance diario da Consellería de Sanidade rexistra un novo incremento do número de casos activos de covid-19. De feito, a área sanitaria de Santiago e Barbanza supera por primeira vez o milleiro de contagios, nunha xornada na que a situación de Boiro empeorou ata situarse entre os municipios no nivel 2 de alerta.
O termo boirense súmase así a Muros, que xa estaba no nivel 2, ao rexistrar máis de 14 novos casos na última semana. A boa noticia é que Noia baixa de nivel e queda no un, no que tamén aparecen Porto do Son e Ribeira. En canto aos demais municipios da comarca, a incidencia do virus é baixa polo momento e aparecen en verde no mapa do Sergas, o nivel cero, o que significa que na última semana detectáronse menos de sete contagios.
No que respecta ao conxunto da área sanitaria, a situación é preocupante ao superarse por primeira vez o milleiro de casos activos. En concreto, segundo os últimos datos oficiais, son 1.047 as persoas que están a tratamento por coronavirus. A maioría presentan síntomas leves e están a seguimento nos seus fogares, pero a cifra de pacientes hospitalizados tamén se incrementou nas últimas horas ao contabilizarse cinco máis que onte. En total son 66 as persoas ingresadas no Clínico e no HM A Rosaleda (unha), das que oito se atopan graves e permanecen na unidade de coidados críticos do CHUS, unha máis que o día anterior.
As 1.410 probas PCR practicadas na última xornada na área sanitaria permitiron diagnosticar 118 novos casos, mentres que o número de curados tamén experimentou un incremento importante. Non en balde, deuse a alta a un total de 57 pacientes, co que as persoas que superaron a enfermidade elévanse a 4.033 desde o inicio da pandemia.
