A depuradora da Pobra participa noutro dos proxectos sobre coronavirus
08 jul 2020 . Actualizado ás 05:00 h.A principios do mes pasado, puxéronse en marcha en Galicia varios proxectos de investigación para tratar de coñecer a evolución da pandemia a través da análise das augas residuais de distintas depuradoras. Unha das estacións seleccionadas para o traballo que desenvolve a Universidade de Santiago de Compostela (USC) coa colaboración da Xunta é a de Ribeira, onde se realizaron diversas tomas de mostras nas últimas semanas. O estudo prolongarase durante un par de meses máis, pero ata o momento non se detectaron restos de covid-19 na EDAR ribeirense.
Este resultado, que se repite nas outras depuradoras analizadas, non sorprendeu aos responsables da investigación, entre outras razóns porque coincide coa evolución da pandemia, que xa estaba en retroceso na comarca cando se iniciaron os traballos de toma de mostras.
Con todo, o proxecto terá continuidade durante un par de meses máis. De feito, hai uns días asinouse o convenio entre a USC, a Xunta e a empresas que xestionan as plantas nas que se toman as mostras para dar continuidade á investigación, que ten como obxectivo que as instalacións de depuración de augas residuais funcionen como sistemas de vixilancia para previr rebrotes de coronavirus.
Estar preparados
Cando se estaba iniciando a toma de mostras, Juan Lema, catedrático de Enxeñería Química e responsable do proxecto, xa adiantaba que non agardaban grandes sorpresas no resultado das analíticas, como así foi, pero destacaba que o importante era validar a metodoloxía desenvolvida para detectar a presenza o virus nas augas residuais para estar preparados ante un posible rebrote: «Esta metodoloxía servirá para anticiparnos ao repunte».
Nesta idea incidiu a conselleira de Infraestruturas, Ethel Vázquez, na firma do convenio que tivo lugar o luns pasado, ao sinalar que grazas ás investigacións realizadas sábese que as augas residuais «conteñen restos de covid-19 ata unha semana antes de que aparezan os síntomas na poboación». De maneira que o obxectivo é crear un sistema de alerta temperá para adoptar medidas con antelación.
Ata agora, as análises realizadas deron negativo e non se detectou carga xenética do coronavirus nas augas residuais de Ribeira. Se nas distintas mostras tomadas notásese un incremento, permitiría constatar a existencia dun rebrote e aceleraría a actuación das autoridades sanitarias para tomar medidas coas que tratar de pórlle coto establecendo protocolos de actuación.
Este traballo de rastreo do covid-19 hase realizado en diferentes EDAR, seleccionadas tanto pola súa localización como pola tecnoloxía que utilizan para depurar as augas residuais, e a de Ribeira non é a única que participa nunha investigación deste tipo.
Varias iniciativas
Non en balde, son varios os proxectos impulsados polas universidades galegas coa colaboración da Xunta. Outro dos estudos que están en marcha están a realizalo a Universidade de Vigo e o CSIC e, tras o negativo en coronavirus nas primeiras mostraxes, ampliouse a novas plantas depuradoras.
Unha das seleccionadas é a EDAR da Pobra, onde xa se empezou a tomar mostras para buscar restos do virus.
A idea, unha vez que se validen as metodoloxías da investigación, é establecer uns puntos fixos que actúen como sistemas de detección temperá do virus, pero fontes da Consellería de Infraestruturas indicaron que aínda está por definir cales serán, aínda que se está traballando niso.