Unha rianxeira, entre os detidos pola Garda Civil por 31 delitos contra o patrimonio

Unha veciña de Rianxo foi detida, xunto a un home residente en Teo, como presunta responsable dun total de 31 delitos contra o patrimonio. A Garda Civil iniciou a investigación que derivou en ambos os arrestos o pasado mes de novembro e non descarta o esclarecemento dun maior número de feitos delituosos no marco desta operación, denominada Futrón.

En concreto, os dous detidos están acusados de 30 delitos de roubo con forza no interior de vehículos e un máis no interior dunha vivenda. Os feitos tiveron lugar nos municipios de Ames, Teo, Padrón e Pontecesures.

Fontes da Garda Civil explicaron que a investigación se iniciou no mes de novembro do ano pasado, cando se tivo coñecemento de que nas poboacións de Bertamiráns, Milladoiro, Cacheiras e Montouto, así como nas urbanizacións Campos de Maribel, Os Tilos e Aldea Noa, producíronse numerosos roubos no interior de vehículos. De feito, esta situación xerou certa alarma social nos municipios nos que tiveron lugar os feitos.

As xestións realizadas polos axentes do posto da Garda Civil de Milladoiro levaron á identificación dos sospeitosos. Procedeuse ademais ao rexistro da vivenda dun deles, durante o cal se puideron recuperar numerosos efectos e xoias relacionados cos roubos investigados. Todo iso levou á detención dos dous presuntos autores destas subtraccións, aínda que a operación segue aberta. De feito, non se descarta o esclarecemento dun maior número de feitos delituosos.

---

---

---