A celebración da vixilia da Inmaculada atraeu a Ribeira a medio milleiro de mozos que participaron en múltiples actividades
06 dic 2019 . Actualizado ás 22:36 h.Ao ser festivo, a actividade nas rúas de Ribeira hoxe estaba baixo mínimos, e talvez por iso chamaba máis a atención a presenza de varios grupos de mozos camiñando dun lado a outro capitaneados por uns voluntarios non menos novos identificados con chalecos vermellos. Eran os participantes nun amplo programa de actividades organizadas pola Delegación de Infancia e Mocidade da diocese co gallo de a celebración da vixilia da Inmaculada, ao redor de medio milleiro de persoas procedentes de distintos puntos da xeografía galega que se formaron en valores con distintos talleres e a ritmo de rap.
Ás once da mañá estaba prevista a chegada a Ribeira de varios autobuses con rapaces procedentes de lugares como Arzúa, Betanzos, Santiago, Laxe, Pontevedra, Vigo ou Sada, entre outros, que tras a benvida se dividiron en grupos para asistir a un dos dez talleres que se impartiron de forma simultánea en distintos puntos da cidade. Inclusión, igualdade, liberdade, solidariedade e respecto ao medio ambiente son algúns dos valores nos que se incidiu ao longo da xornada.
Os temas que se abordaron para profundar neses valores foron en grao sumo variado, e mentres varios dos talleres versaron sobre as redes sociais e a súa utilización, noutros se enfrontou aos mozos coa realidade máis crúa. É o caso da charla a cargo do capelán do cárcere de Teixeiro e dúas das voluntarias que traballan cos presos.
De Teixeiro a Ambar
O encontro serviu para que os rapaces se familiarizasen con conceptos como a presunción de inocencia, o dereito de defensa e de tutela xudicial ou a reinserción, e aprenderon tamén que con moita frecuencia son as malas decisións as que levan a unha persoa a acabar entre reixas.
Tamén lles explicaron como son as instalacións do penal de Teixeiro, que os presos seguen tendo dereitos e que o paso polo cárcere é un transo difícil de dixerir: «É duro estar dentro e é duro saír, moitos teñen medo a saír».
Outra das actividades trataba sobre romper barreiras, contou coa participación de usuarios e persoal da asociación Ambar e nela invitouse aos participantes a pórse no lugar do próximo: «Ás veces non somos capaces de abrir os ollos e ver que diante temos persoas».
Case todos os talleres se celebraron a cuberto en distintos locais da parroquia, de Cáritas ou mesmo na lonxa de Ribeira, pero tamén houbo actividades ao aire libre, como unha sobre o cambio climático que levou aos mozos ata o areal de Coroso, ou o concerto do dúo rapeiro Grilex na praza da igrexa de Santa Uxía. Esta foi unha das iniciativas máis aplaudidas polos asistentes e precedeu a unha procesión desde Santa Clara e á eucaristía a cargo do arcebispo Julián Barrio.