Hemeroteca: O monte A Curotiña lograba a declaración de paisaxe de interese nacional
BARBANZA
Un avogado e veciño da Pobra, Félix Roig Houra, realizou os trámites oportunos
16 novs 2019 . Actualizado ás 05:00 h.A cima do monte A Curota, A Curotiña, era declarada hai 86 anos paraxe de interese nacional. Na información de La Voz de Galicia na que se daba conta da devandita noticia aludíase a un avogado e veciño da Pobra, Félix Roig Houra, a quen se lle atribuían as xestións realizadas para a obtención da devandita distinción. Realizara o primeiro trámite en decembro de 1927, cursando ante a alcaldía unha razoada instancia co fin de solicitar o apoio da corporación local, como así ocorreu. Foi despois cando reclamou a declaración que entón se denominaba sitio natural de interese nacional.
No informe elaborado por Félix Roig aludíase ás características da Curotiña, un monte de 625 metros de altura pertencente á serra de Barbanza, situado nas proximidades de «unha costa suave, bastante varia e sumamente fértil e graciosa». O avogado describía con detalles a paisaxe que se divisaba desde o monte.
Aquela declaración supuña a obtención dunha serie de vantaxes de cara á conservación do monte e a mellora dos seus accesos.