Baixo a dirección da coreógrafa Clara Ferrao, oito usuarias da asociación idearon un baile para reivindicar a igualdade e denunciar a violencia machista
14 novs 2019 . Actualizado ás 05:00 h.Hai moitas formas de reivindicar os dereitos e as mulleres de Ambar decantáronse por botar mano da arte. Oito usuarias desta entidade danlle vida sobre as táboas e Elas, unha peza de danza coa que queren sumarse á loita pola igualdade e á denuncia contra a violencia machista. Aínda que elas son as principais protagonistas desta iniciativa, contaron coa axuda dunha especialista na materia, a coreógrafa Clara Ferrao, que se encargaron de dirixir o proxecto. O resultado é un baile que pretende chegar a diferentes escenarios da comarca, detrás do que se esconde un proceso que arrincou hai tempo.
Estas oito mulleres de Ambar son as integrantes dun grupo de artes escénicas que iniciou a súa andaina no seo da entidade fai un lustro da man de Celtia Iglesias , a integradora social. Durante ese período, o colectivo recorreu a diferentes medios de expresión artística para abordar temas de actualidade como o empoderamiento feminino ou a creación da comunidade. Nesta ocasión, a proposta de Deloa, optou por sumarse coa súa intervención artística á conmemoración do 25N.
«Estas usuarias que participaban en actividades relacionadas co teatro e coas artes plásticas querían transmitir a través da danza», explica Celtia Iglesias . Previamente, desmenuzaron nun taller as emocións que espertaban nelas palabras como a igualdade e a violencia, chegando mesmo a construír unha escultura: «A base representa aquilo que elas queren deixar atrás, mentres que o corpo simboliza o que lles fixo medrar como mulleres. A maiores, nunha cesta que a figura sostén entre as mans metemos frases para regalarlle ás mulleres do futuro, como “cumprir os soños” ou “camiñar sen medo”».
Concluída esta primeira fase, as mulleres de Ambar puxéronse ao choio para representar todos eses sentimentos sobre as táboas. Mesmo se abriu o proxecto a outros colectivos sociais: «Abrimos a porta á participación das usuarias dos Centros de Información á Muller da zona, pero finalmente non se sumou ningunha», comenta Celtia Iglesias .
Gran dose de ilusión
Así que as oito integrantes do taller artístico da asociación puxéronse ás ordes de Clara Ferrao, unha coreógrafa que, desde a súa academia de Nigrán, xa traballou noutras ocasións con mulleres con diversidade funcional. Ela valora moi positivamente a experiencia: «Foi un proceso sinxelo, pois elas amosáronse moi dispostas e ilusionadas desde o primeiro momento. Incluso traballaban soas, cando non había ensaios programados».
O resultado final é un baile que parte de dúas imaxes, as primeiras que lle viñeron á cabeza a Clara Ferrao en canto expuxéronlle este proxecto: mulleres que viven ocultas e medorentas do que poida ocorrerlles e a felicidade da liberación. Sobre o escenario, as bailarinas de Ambar representan estas ideas como un traxecto no que unha muller consegue liberarse grazas á axuda doutras persoas que están ao seu redor.
A coreografía, Elas, foi estreada fai uns días na Pobra e conseguiu pórlle a pel de galiña a máis dunha persoa, incluída a propia Clara Ferrao: «Foi unha presentación moi emotiva, porque comprobei que estas mulleres tiñan unha sensibilidade especial na escena». E a idea de Ambar é que a partir de agora emprenda unha xira por diversos puntos da comarca: «Estamos dispostas a ir alí onde nos chamen. Está claro que se facemos este tipo de proxectos é para darlles visibilidade despois», explicou Celtia Iglesias . O baile encaixa á perfección na conmemoración do 25N.
Estrea. A coreografía Elas foi estreada a pasada fin de semana no teatro Elma da Pobra. O acto incluíu un coloquio posterior sobre a igualdade.
Próxima cita. O próximo día 23, o colectivo de baile de Ambar actuará na casa de cultura de Porto do Son. Tamén haberá coloquio e proxectarase un vídeo sobre o proceso de elaboración da coreografía.