A maioría dos concellos están inmersos na elaboración dos documentos
19 novs 2018 . Actualizado ás 05:00 h.Ademais de encargarse de controlar o cumprimento da franxa de protección de incendios, no que respecta á limpeza de leiras e curta de eucaliptos e piñeiros, os concellos tamén están obrigados a contar con plans de protección forestal. A normativa, segundo explicaron varios mandatarios, estableceuse tras o ocorrido fai un ano no sur da comunidade, onde o lume puxo en perigo numerosas poboacións. Con todo, a sobrecarga de labores á que están sometidas as Administracións locais motivou que o proceso fose demorándose. Con todo, a directriz é de obrigado cumprimento e aos concellos chegaron requirimentos para que a executen, polo que os dirixentes barbanceses puxéronse ao choio.
Para confeccionar estes plans, a maioría está a optar pola contratación de empresas privadas. Así o fixeron xa en Boiro, Outes e Rianxo. En breve sumaranse á relación Mazaricos e Porto do Son. No caso de Ribeira, o alcalde, Manuel Ruiz, explicou que se solicitou a colaboración da Xunta para a súa elaboración.
Proceso participativo
O rexedor rianxeiro, Adolfo Muíños, sinalou que os traballos xa levan tempo en marcha e que os encargados da redacción mantiveron reunións cos responsables de comunidades de montes, «para que sexa un proceso participativo no que se teñan en conta diversas achegas».
A preparación desta estratexia de acción suporá un desembolso de entre 2.000 e 3.000 euros, comentou o mandatario, quen ao tempo subliña a idoneidade dun documento deste tipo: «Habería que analizar tamén como funciona a estratexia forestal. As limpezas deberían intensificarse durante todo o ano».
O plan debe incluír os puntos de captación de auga, as vías de acceso, os recursos materiais e humanos dispoñibles ou o número de motobombas, comenta o sonense Luis Oujo, quen precisa: «Temos que contratar unha empresa porque no Concello carecemos de persoal especializado para un traballo deste tipo». O rexedor destaca que as Administracións locais ven desbordadas: «Cada vez temos máis responsabilidades. Hai que facer rozas, cortas, vixiar que cada veciño cumpra. Son moitas cousas e non damos para todo».
O seu homólogo boirense, Juan José Dieste, incide na necesidade de incrementar a protección nos núcleos e sinala que o documento debe incluír tanto medidas de prevención como de intervención. O alcalde agarda que o plan poida estar concluído o próximo mes.
Pola súa banda, o mazarico Juan José Blanco Riveiro comenta que aínda non se puxeron ao choio, pero explica que se fará de forma inminente. Con todo, opina que as Administracións deberían ofrecer axudas aos concellos, dado que isto supón un desembolso máis aos que xa deben facer fronte.
O obxectivo de todos os mandatarios é que estea listo antes do comezo da campaña de alto risco de incendios. Con todo, para o Concello de Noia o cumprimento desta directriz non supón problema, dado que o rexedor, Santiago Freire, explica que xa contan cun plan de prevención deste tipo e sinala que, hai un ano, fixéronse actualizacións para introducir unha serie de aspectos que figuran na normativa.