Leva unha década recadando fondos para axudar aos necesitados de Costa do Marfil
05 jul 2018 . Actualizado ás 05:00 h.Dificilmente podería imaxinar Desiré Kouakou Tanoh (Costa do Marfil, 1972) a repercusión que sobre a súa vida, e sobre a dos demais, tería a decisión de aceptar o ofrecemento de vir a Galicia realizado polo seu amigo e párroco de Mazaricos, Xosé Manuel Pensado Figueiras. Ambos coincidiran en Madrid na súa época de estudantes, onde forxaron unha amizade que se mantivo durante os case cinco anos que, tras ordenarse sacerdote na Universidade Pontificia de Comillas, pasou como misioneiro carmelita en Burkina Faso. Lugar que segundo explica, serviulle para «tomar verdadeira conciencia da dimensión da pobreza en África».
En loitar por erradicala e en mellorar as condicións de vida dos que viven no continente negro comprometeu o seu esforzo desde que aterrou en terras mazaricas -foi párroco en Alborés e Os Vaos- hai 12 anos. No labor, estivo acompañado, ademais de por o seu mentor Xosé Manuel, por un número importante de veciños e amigos cos que no 2008 puxo en marcha Égueire, unha asociación de cooperación para o desenvolvemento en África e centrada principalmente en Costa do Marfil.
Alí, tal e como apunta o propio Desiré, levaron a cabo distintas iniciativas encamiñadas, principalmente, a mellorar a educación, sanidade e, en xeral, as condicións de vida dos habitantes da rexión de Grand-Lahou. «Puxemos en marcha varios proxectos que tiveron resultados espectaculares. Entre eles, varias campañas de recollida de alimentos e material escolar para casas de acollida infantil, un proxecto de microcréditos a cooperativas de mulleres ou a maternidade recentemente inaugurada na vila de Nandibou e que agora intentaremos equipar», apunta o párroco, que tamén sinala que durante todo este curso dous mozos marfileños estiveron a se formar no Centro de Promoción Rural ? Efa Fonteboa de Coristanco para despois exercer como monitores nos proxectos de capacitación agraria que manteñen abertos en Costa do Marfil.
Plan formativo
«Para nós, a formación dos mozos resulta unha prioridade porque é a mellor forma de que poidan valerse por si mesmos e labrarse un futuro», apunta Desiré, que estes días se atopa inmerso nos preparativos da décima edición da Festa Africana que terá lugar o sábado en Mazaricos e que pretende ser, ademais dun encontro festivo, unha xornada de reflexión sobre a realidade africana.
«Queremos que sexa un punto de encontro de persoas solidarias e comprometidas con axudar aos máis necesitados. Nestes dez anos tivemos un respaldo masivo que esperamos se repita nesta edición», sinala Pensado.
A celebración terá lugar no recinto feiral da Picota a partir do mediodía e, ademais do típico xantar africano -destaca polo seu particular condimentación e por produtos como o attieke, sémola de mandioca, moi habitual na gastronomía do país centroafricano- os asistentes poderán participar nunha degustación de bebidas marfileñas na que non faltará o bisap, un preparado con flor de Dah, zume de jengibre e azucre. O prezo por persoa é de 20 euros.
Desde a ONG Égueire -declarada de interese público polo Ministerio do Interior o pasado marzo- tamén se programou un anciño solidario con produtos artesáns, unha exhibición de pintura e a presentación do libro Voces na selva, de Koffi Eric Innocent Konan e da profesora mazarica María Teresa do Río Romero . Ademais funcionarán desde primeira hora da mañá varios talleres de baile, teas e barbería de temática africana e actuará a coral marfileña Saint Luc de Banabakintu.
Tanto os que desexen participar como os que queiran colaborar coa entidade poden atopar toda a información para facelo en www.egueire.org.
A cita: A décima Festa Africana terá lugar este sábado, a partir do mediodía, no recinto feiral da Picota.
Os obxectivos: Ademais dunha xornada lúdica, a oenegué Égueire busca recadar fondos.