Un central que xogou como dianteiro foi o verdugo do Lesende contra o Escravitude
BARBANZA
Este cambio de pezas, con Anxo Angueira como referencia en ataque, foi determinante
24 abr 2018 . Actualizado ás 05:00 h.Algún tivo que pellizcarse para comprobar se o que vía era verdade. «O central deles xogou de dianteiro. É un home dun 1,90, unha auténtica besta. Marcou os dous goles. Fíxonos moito dano», recoñeceu o técnico do Lesende, un Alberto Albán que viu como o seu equipo deixaba a segunda praza tras caer por 1-2 contra o Escravitude.
Este cambio de pezas, con Anxo Angueira como referencia en ataque, foi determinante. «Empezamos ben, pero nun córner marcáronnos o 1-0. Ao volver do descanso fixeron o 2-0. Reaccionamos na recta final, os xogadores soltáronse, pero non foi suficiente». Adrián Sueiro, tras un centro de Beto, puxo o 1-2, aínda que sen tempo para darlle a volta ao marcador.
Deixebre-Araño: 2-3. O Peteiro. Se alguén tivo fe, foi o Araño. Cun 2-0 en contra nos primeiros dez minutos, o bloque rianxeiro agarrouse ao cravo ardendo para reducir a distancia no electrónico. Tino , cun dobrete, puxo as táboas cando parecía que o choque estaba morto. Nacho, de falta directa, fixo o 2-3 para alegría da afección que viaxou co equipo.
Taragoña-Sálvora: 1-0. A Lomba. Os rianxeiros foron xustos vencedores dun duelo que dominaron durante os 90 minutos. A madeira foi o mellor aliado do Sálvora, que viu como os paus evitaban unha goleada local. Marcos, tras un erro defensivo, foi o autor do solitario 1-0.
Cabo-Praíña: 1-2. Valiño. ¡Que alguén pare a Lucas Vázquez! Iso é o que berran os rivais cada vez que ven ao punta do Praíña vestirse de curto. O zurdo volveu facer das súas con dous goles que valeron tres puntos. Logrouno contra un Cabo que pelexou ata a extenuación. Silva, no 90, anotou o tanto da honra desde os once metros.
Carcacía-Palmeira: 2-1. Mirarríos. O 2-1 de Jorge non foi suficiente para que os barbanceses rescatasen un punto a domicilio. Juan Gómez e Rodrigo rubricaron os tantos locais.
Ponteceso-Mazaricos: 2-2. O Pinguel. O colchón de puntos esgótase para un Mazaricos que sumou o seu segundo empate consecutivo. Esta vez foi por 2-2, e grazas ao dobrete de Fernando, que rescatou ao seu equipo de perder a segunda praza, a única que dá acceso á fase de ascenso.
Outes-Zas: 4-0. Mario foi o home do partido. A súa carta de presentación, catro goles e de todas as cores, de rexeite, por baixo e á escuadra. O punta foi un filón para o Outes, que intentará apertar para lograr a salvación esta tempada.
Monte Louro-Malpica: 2-2. Agra dá Filgueira. Respiran os de Óscar Leis, que por fin certificaron a permanencia. Juan, desde 40 metros, e Adrián, antes do descanso, puxeron os goles locais para acadar o obxectivo.
Cee-Lira: 1-1. Sampaio de Refoxos. Fíxose de rogar, pero os carnotáns tamén serán conxunto de segunda o próximo ano. Bruno, desde o punto de penalti, anotou o 0-1, suficiente para sumar o prezado punto.