«A partir das sete da tarde, esta rúa dá medo do baleira que está»
VILAGARCÍA DE AROUSA
O peche de bares e cafeterías está a deixar sen clientes aos demais establecementos. O Partido Popular pide ao alcalde Alberto Varela que «arrime o ombro» desde Ravella
11 novs 2020 . Actualizado ás 05:00 h.«Caía de caixón que nos ía afectar». A que fala é Rocío Louzán, presidenta da asociación do comerciantes de Vilagarcía Zona Aberta, e refírese á incidencia que o peche de bares e cafeterías está a ter nos demais establecementos da localidade. Abonda dar un paseo calquera tarde, cando xa se puxo o sol, que precisamente nestes días é moi pronto, para comprobar que cruzarse cun peón en calquera das rúas máis céntricas da cidade comeza a converterse nunha anécdota, cando ata hai uns días era todo o contrario. Incluso o paso de vehículos por rúas como Juan Carlos I ou Rosalía de Castro, que normalmente están sempre preto do atasco, diminuíu notablemente no que vai de semana.
A sensación é común e en todos os sectores. «A partir das sete da tarde, esta rúa dá medo do baleira que está», comentaba o luns María Abalo, responsable da administración de lotería de Rey Daviña. De feito, apunta a loteira que se está estendendo a idea entre algúns comerciantes de pechar antes os establecementos. Unha solución que tamén valora a propia presidenta da asociación de comerciantes: «Estou a pensar abrir de catro a sete e media», afirma.
Louzán di que se dá cun canto nos dentes, porque no seu establecemento está aguantando o tirón, pero asegura que coñece casos que comezan a ser dramáticos. «Hai a quen non lle entra na tenda nin unha soa persoa durante toda a tarde», afirma a presidenta de Zona Aberta. Os sectores do téxtil, o calzado ou a lencería son os que peor o están pasando con esta nova normalidade que apareceu no que xa era a nova normalidade. Máis aínda, apunta a máxima responsable dos comerciantes de Vilagarcía que mesmo as barberías están a notar tamén o bajón na súa clientela. «Se a xente non teñen onde tomar un café, xa queda no salón de casa», resume.
Porque, convén lembrar, que á marxe da baixada de enreixados das cafeterías e dos bares, únese o peche perimetral de Vilagarcía, á que soamente se poden desprazar veciños de Vilanova e de Cambados, cando os comerciantes vilagarciáns teñen tamén unha notable clientela do resto da comarca.
E chega o Venres Negro
A todo isto, e ás nefastas consecuencias que para os demais establecementos está traendo o drama polo que están pasando os hostaleiros, únese a ameaza que supón a chegada uno ano máis do temido Venres Negro. A ecuación é doado de resolver: se xuntamos que a pesar de que non é obrigatorio estamos a asistir practicamente a un confinamento sobrevindo, sumámolo aos inalcanzables descontos que para as pequenas tendas supón as ofertas dos grandes monstros da rede e a que cada vez está máis de moda adiantar xa a novembro as compras do Nadal, o resultado para os comerciantes é demoledor.
Un apuntamento, ou dous, xogan a favor dos pequenos comerciantes. Por unha banda, que a saída do confinamento revelou que unha boa parte da clientela habíalles sido fiel e agardounos ata que puideron volver abrir as portas. Polo outro, as campañas para fomentar as compras. Neste sentido, convén lembrar que o Concello de Vilagarcía xa comprometeu unha segunda edición dos bonos «Son dá casa», que tan bo resultado deron durante o pasado verán.
O Partido Popular pide ao alcalde Alberto Varela que «arrime o ombro» desde Ravella
O Partido Popular de Vilagarcía propón ao goberno socialista de Ravella a creación dunha liña de axudas municipais orientada aos negocios de proximidade, tanto do sector do comercio como da hostalería locais, para paliar a complexa situación que están a atravesar polos efectos da pandemia derivada do covid-19.
Os populares non só piden a creación das axudas; tamén solicitan ao alcalde, Alberto Varela, que «arrime o ombro desde Ravella e que complemente economicamente o programa autonómico, xa que o Concello é a administración máis próxima, a máis áxil, e no caso de Vilagarcía, conta cunha importante capacidade de recursos financeiros, que han de repercutir na cidadanía, agora máis que nunca», afirman desde o grupo da gaivota.
O PP sostén que noutras localidades xa se presentaron iniciativas e axudas concretas, tanto económicas como materiais, en tanto que en Vilagarcía, argumenta, aínda se necesita un empuxón «para reforzar o programa posto en marcha pola Xunta».
«A Xunta quedou soa»
«Hai que engadir axudas directas, tanto no plano económico como na dotación de elementos e materiais que axuden a facer máis atractivos os negocios en canto póidase recuperar a actividade. Toda axuda é pouco nun momento extremadamente delicado, no que moitos pequenos negocios se están xogando o seu futuro e a súa viabilidade», aconsellan desde o PP, que afirma que a Xunta se quedou soa» e que esta batalla «non é de partidos».