A actuación prevé varias melloras na zona peonil
23 ene 2019 . Actualizado ás 09:44 h.A primeira fase das obras do paseo do río do Con comezou fai uns días, coa retirada das varandas no tramo que discorre desde a avenida Doutor Tourón ata Vista Alegre, e Ravella acaba de adxudicar tamén a renovación no tramo que discorre tras a praza de abastos. Será a firma Marconsa a que se faga cargo dos traballos, que teñen un orzamento de 98.455 euros. Ademais de cambiar as varandas, a actuación prevé a plantación de árbores, a mellora da iluminación da zona peonil e a instalación de papeleiras.
As obras permitirán renovar por completo as varandas, que seguirán a estética do tramo que se está executando agora mesmo. O material que se utilizará será o aceiro cortén.
Os traballos inclúen, ademais, diversas actuacións na zona peonil. Así, mellorarase a iluminación na zona verde situada na desembocadura do río, no famoso triángulo que durante un tempo serviu como improvisado botellódromo. Ademais, o paseo García de Caamaño cambiará a súa fisionomía porque nel se plantarán varias árbores pegadas á beira para xerar zonas de sombra. O proxecto prevé a instalación de papeleiras tamén co aceiro cortén como material principal.
A obra de reforma das varandas do río do Con foi dividido en tres fases polo Concello. Coa primeira delas xa en execución e a segunda adxudicada completarase cunha terceira que aínda non foi contratada e que suporá a restauración da malla da varanda da ponte de Vista Alegre. Aquí manterase o tipo de malla, unha das súas características destacadas, pero cambiarase o material.
«Tras a execución destas tres fase, o último tramo do leito fluvial do Con presentará unha imaxe integral e moderna, resaltando o conxunto do privilexiado marco monumental no que se atopa, e tamén gañará en seguridade con elementos máis sólidos e consistentes», apuntan desde o goberno local.