O BNG lembra ao Ministerio, Adif e ao Concello de Valga a súa promesa de que a infraestrutura permitise o paso dos camiñantes
29 oct 2025 . Actualizado á 05:00 h.O BNG de Valga insiste na necesidade de que o viaduto de Castiñeiras inaugurado a comezos de setembro e que supuxo o peche do antigo paso a nivel adáptese para permitir o paso de viandantes. Os nacionalistas elevaron a demanda ao Congreso dos Deputados e ao Senado, onde Néstor Rego e Carme da Silva formularon senllas preguntas ao Ministerio de Transportes. A resposta deste reza que «o Proxecto Construtivo aprobado non contempla beirarrúas nin pasos de peóns en todo o acceso á estrutura».
Unha afirmación que, en opinión da oposición valguesa, rebatería as palabras do propio Ministerio, Adif e o Concello de Valga. Segundo o equipo de Fran Devesa, todos eles anunciaron en múltiples ocasións que a infraestrutura contaría con beirarrúas e varandas co obxectivo de garantir a circulación segura das persoas. O partido insta aos tres organismos a «revisar o proxecto e dotar ao viaduto das beirarrúas e pasos peonís que se anunciaran, tal e como figuraba no convenio asinado en 2022, que establecía a eliminación dos pasos a nivel e a creación de accesos seguros tanto para vehículos como para persoas» e afea que «o subdelegado do goberno e o alcalde de Valga vaian inaugurar unha obra pública de case catro millóns de euros que incumpre o que anunciaran previamente». «É absolutamente inadmisible que unha infraestrutura deste custo e importancia se conciba só para vehículos, esquecendo ás persoas que camiñan», apreciou Devesa.