Un ciclista sae despedido e só sofre rasguños ao chocar contra un coche en Valga
VALGA
O home que manexaba a bicicleta non se decatou da presenza do automóbil, e golpeouse contra o seu parabrisas antes de caer no outro carril de circulación
03 may 2021 . Actualizado ás 05:00 h.Un aparatoso accidente de tráfico, ocorrido ao mediodía do sábado no municipio de Valga , puido traer graves consecuencias para un dos seus protagonistas, un ciclista de Padrón que chocou contra un automóbil cando trataba de incorporarse á estrada xeral. A pesar de que o golpe foi duro, e o home saíu despedido, a fortuna quixo que, aparentemente polo menos, só sufrise uns rasguños.
O incidente tivo lugar ao redor de únaa da tarde no lugar do Forno. O ciclista quixo incorporarse á estrada PO-548, que articula as comunicacións do Baixo Ulla e conduce a Vilagarcía. Ese era, precisamente, o sentido cara ao que circulaba o automobilista contra cuxo vehículo chocou a bicicleta. Polo visto, o veciño de Padrón que a manexaba non se decatou da súa presenza. O impacto lanzouno primeiro contra o parabrisas, caendo a continuación sobre o carril contrario, polo que nese momento non transitaba ningún outro vehículo. O grupo de urxencias de Padrón, Protección Civil de Valga , Tráfico e o 061 atenderon ao ferido, que se atopaba ben.