O pequeno municipio apela á conciencia cidadá para que se denuncie calquera indicio de malos tratos
12 mares 2019 . Actualizado ás 05:00 h.O domingo, Javier Bello empuñou unha das súas escopetas de caza e abriu fogo sobre a súa muller, María José Aboy, para a continuación suicidarse e arruinar a vida de dúas familias traballadoras de Valga , o lugar no que ambos vivían, e Carracedo (Caldas), de onde o home era oriúndo. O crime mantén ao pequeno municipio arousán en estado de conmoción. Vinte e catro horas despois do asasinato, os ánimos oscilaban onte entre a indignación, a tristeza, o horror e a incredulidade. De todos os xeitos, se algo é capaz de emerxer do abismo dunha traxedia así é a dignidade dunha reacción colectiva que se sobrepuxo á dor para mostrar un rotundo rexeitamento a calquera forma de violencia machista. Unha actitude encarnada polos once concelleiros que representan aos seus veciños e aprobaron non só o decreto de tres días de loito, senón tamén, e sobre todo, unha condena exemplar tras un pleno sobrecogedor.
Foi a concelleira de Igualdade, Begoña Piñeiro, quen, coa voz rota, leu a declaración institucional: «A eliminación da violencia contra as mulleres é un reto de toda a sociedade, unha tarefa conxunta que require unha actuación unitaria e máxima coordinación, colaboración e cooperación para facer fronte aos maltratadores e construír, entre todos, unha sociedade libre de violencia sobre as mulleres». «A violencia de xénero non é un asunto privado, senón un problema social que se combate con tolerancia cero ante calquera comportamento machista». Son algúns dos fragmentos centrais do documento, subscrito sen fisuras polos dous grupos políticos que conforman a corporación local, o PP e o PSOE.
Coherente con estas premisas, o alcalde, o popular José María Bello Maneiro, fixo un chamamento á cidadanía en nome dos seus compañeiros: «Que se denuncie ante os servizos sociais do Concello, o centro de información á muller, as autoridades policiais ou o teléfono contra o maltrato, 016, calquera situación coñecida de violencia de xénero co fin de evitar novas vítimas». Mesmo, engadiu, «calquera discusión violenta». De acordo por unha vez en todo co seu adversario político, a portavoz socialista, María Ferreirós, veciña da vítima, á que coñecía, lembrou o 8M e subliñou que «é a desigualdade a que está na base; non se pode permitir nin un paso atrás no avance do feminismo».
O minuto de silencio que se gardou ante as portas da Casa do Concello repetiuse, pouco despois, no instituto de Valga , onde un alumno e unha alumna leron un comunicado de repulsa e unha fermosa poesía. Tamén no IES Aquis Celenis, de Caldas, no que os dous fillos do matrimonio, ambos os maiores de idade, estudaran. «Aínda non cren que sexa realidade», lamentou o rexedor, que pola mañá os visitou xunto ao equipo de psicólogos que os atenden.
Sen denuncias previas nin problemas que teñan transcendido, será difícil saber que moveu a Javier Bello a matar a María José. Por desexo dos seus fillos, ambos recibirán sepultura no camposanto de Carracedo esta tarde. Namentres, aqueles que coquetean coa banalización desta secuela, poxando as súas conciencias por un mesquiño puñado de votos, poden animarse a dar un paseo por Valga un destes días. Quizais aprendan algo.