Esvaróns en Vilagarcía e quilos de sal nas estradas para evitar accidentes
VALGA
Os servizos de urxencias de boa parte da comarca do Salnés dedicaron a mañá de onte a botar sal en rúas e estradas, a fin de eliminar as placas de xeo que se formaron durante a noite. En Vilagarcía a actividade foi intensa. Segundo informa o servizo municipal de Emerxencias, á primeira hora estendeuse sal na zona de Vista Alegre e A Xunqueira, onde varios peóns se escorregaron e caído. Unha vez en marcha, seguiron co servizo nos lugares nos que a experiencia indica que adoita haber problemas de formación de placas de xeo. As pasarelas e pontes sobre o río do Con, as beirarrúas de Rodrigo de Mendoza e un tramo da rúa San Roque, nas inmediacións da capela, foron as súas primeiras paradas. Tamén estenderon sal no paso de peóns do Cavadelo. E en Castroagudín.
Vilagarcía non foi o único lugar no que os servizos de urxencias tiveron que empregar sal para loitar contra os efectos do frío. En Valga , efectivos do GES realizaron varios percorridos por diversas pistas de Valga , botando sal en moitas delas. En total, utilizaron uns doce sacos duns 25 quilos cada un.
Tamén no Grove foi necesario utilizar sal nalgúns puntos de Campos e Estonllo, ao detectarse a presenza de xeo na calzada. «Varios condutores chamaron informando de que escorregaban vos coches e por iso actuamos; non é algo que fagamos con frecuencia», explican desde a base do grupo municipal de urxencias.
Pero o frío tamén provoca outro tipo de incidentes, como o que se rexistrou o xoves pola noite no Rial. Os propietarios dunha vivenda decidiron acender a cheminea, pero ao non estar esta limpa no seu interior, comezou a arder.