Os bombeiros de Ribadumia foron alertados cara ás dez da mañá e resolveron con presteza un suceso que non deixou danos persoais
20 nov 2025 . Actualizado á 21:27 h.A mañá do xoves comezou con susto no lugar de Cacabelos. Cara ás 9:46 horas, os bombeiros de Ribadumia recibían unha chamada alertando dun incendio nunha vivenda particular neste lugar da parroquia de Vilariño, en Cambados. Ao chegar ao momento, atopáronse un lume bastante avanzado, que afectaba sobre todo o tellado da casa, o cal xa se desprendera parcialmente. A familia que vive na casa xa desaloxara o inmoble, polo que só tiveron que ocuparse da extinción do incendio. Cara ás 12:30 a situación atopábase xa baixo control e os traballadores atopábanse recollendo tellas caídas e outros materiais calcinados. As chamas afectaron sobre todo no faiado da vivenda, onde se orixinou o lume, e no tellado, sen chegar a afectar á planta habitada do inmoble, nin á casa contigua. Os bombeiros apuntan á desorde habitual neste tipo de estancias como obstáculo para coñecer as causas concretas dun suceso que non deixou ningún dano persoal.