Vilagarcía segue mellorando e ten unha incidencia a 14 días de 160 casos por cen mil habitantes
RIBADUMIA
Falece unha sexta usuaria da residencia de Ribadumia
19 novs 2020 . Actualizado ás 05:00 h.Unha muller de 83 anos converteuse na sexta usuaria do residencia Domusvi de Ribadumia que falece a causa do coronavirus. A octoxenaria estaba ingresada no Hospital do Salnés.
Doutra banda, dous casos máis sumou Vilagarcía con respecto á xornada anterior, co que a localidade ten 75 positivos. O dato máis relevante, con todo, no que respecta á evolución do coronavirus é a incidencia a catorce días e, aí, os números da cidade están a mellorar a pasos axigantados, máis aló do goteo diario a favor ou en contra de positivos. Está a mellorar porque a incidencia que presenta é de 160 casos por cada cen mil habitantes. Unha semana antes era de 190 e, máis revelador aínda, é que o dato en Galicia é de 292 positivos por cen mil habitantes.
De feito, Vilagarcía está tendo un comportamento estatístico moito mellor que outras cidades da comarca. Así, O Grove contaba onte 55 positivos, pero a súa incidencia a catorce días é de 431 casos por cen mil habitantes; Cambados ten 72 casos activos e unha incidencia de 431 e Sanxenxo, 81 casos e unha incidencia acumulada de 426.
Segundo o parte diario do Sergas, na área sanitaria de Pontevedra O Salnés mantéñense 60 pacientes con covid ingresados nos hospitais da comarca. Repártense do seguinte xeito: 45 no Complexo Hospitalario Universitario de Pontevedra, cinco no QuirónSalud Miguel Domínguez e dez no Salnés. Son catro menos que onte. Pola súa banda, na uci de Montecelo mantense o mesmo número de pacientes: oito. A Xerencia da EOXI informou de que permanecen nas súas vivendas evolucionando da pandemia 1.186 casos covid, un aumento de 41.