O certame culinario «Pinchanogrove» regresa en 2026 baixo o paraugas de Aprometur
O GROVE
A volta do evento, que levará a cabo do 6 ao 22 de marzo, foi anunciada onte na feira Xantar, de Ourense
23 nov 2025 . Actualizado á 05:00 h.A cita máis famosa de tapas da península meca, «Pinchanogrove», regresará en marzo de 2026, con enerxías renovadas e baixo o paraugas da asociación Aprometur, tras o obrigado parón deste ano, provocado pola falta de financiamento. A volta do evento, que levará a cabo do 6 ao 22 de marzo, foi anunciada onte na feira Xantar, de Ourense, onde a entidade turística promociona tamén a cita de Micogrove ou Setapas e difunde as virtudes turísticas do Grove, incluído unha chiscadela á centola meca.
Trátase, pois, da segundo grande acción que se canaliza desde a asociación, a pesar de que o concurso de petiscos xa leva ás costas seis edicións baixo o mando de Activa Ogrobe. Farao esta vez co respaldo da Xunta de Galicia, e coa intención de que esta vez si, a cita teña continuidade no tempo, pois demostrou xa ser un gran gancho no arranque da primavera.
A volta foi celebrada en Ourense con actuación musical incluída, a cargo da agrupación Arroba de Viño, que se trasladou expresamente para animar a actividade na caseta. Desde alí, Aprometur marcárase promocionar o destino co slogan «Saborea O Grove», que parece ter unha grande acollida por parte do público e recibiu a visita dalgunhas autoridades que non dubidaron en apoiar e eloxiar as propostas. Os encargados de representar a Aprometur charlaron en Ourense coa directora de Turismo Rías Baixas, Romina Fernández, o deputado de Turismo da Deputación de Pontevedra, Jesús Vázquez, e a ex conselleira de Pesca, Rosa Quintana.
Á promoción en Xantar non lle falta detalle, así que co obxectivo de captar novo público, a asociación sortea tamén estancias de fin de semana no Grove, entre quen se achega ata a caseta, un bo gancho para que coñezan calquera das propostas culinarias.