Porunasonrisa recada fondos para enviar un colector con material de barbería e costura
04 feb 2019 . Actualizado ás 05:00 h.En xuño do pasado ano, desde O Grove saíu un colector con destino a Gambia. No seu interior, medicamentos, ropita para bebés, roupa de cama e ata o material deportivo que todos os anos doan os clubs de fútbol desta localidade. A iniciativa partiu da asociación Porunasonrisa do Grove, que xa acometeu numerosos proxectos humanitarios no continente africano, desde a construción de pozos de auga á doazón de todo tipo de material a orfanatos. A entidade quere repetir experiencia o próximo ano. Pero, nesta ocasión, cun fin distinto. Púxose en contacto cun centro de formación que abriu as portas neste país e buscan, tamén, material para formar a perruqueiras e costureiras.
«Oxalá puidésemos recadar todo e mandalo este ano», explica Nati Villanueva quen, xunto co seu marido Mustafá Ennabar, dirixe Porunasonrisa. Pero non é tarefa sinxela. A recollida de material é a parte máis avanzada, pois moitos son os veciños da localidade que colaboran con esta entidade doando medicamentos, material escolar ou roupa que xa non utilizan. O máis complicado é sufragar os gastos do colector. 2.400 euros precisan para poder pagar o transporte de todas estas mercancías. Xa recadou algo, grazas á exhibición de zumba que se celebrou a semana pasada no seu beneficio. Pero precisan máis. E niso seguen traballando semana a semana. Mentres, seguen recollendo todo o que os seus veciños lles doan. «A Gambia imos enviar roupa, cousas de casas, material deportivo, medicamentos...», asegura. E queren, de paso, colaborar cun centro de formación que hai neste país. «É un centro onde hai todo tipo de formación, pero nós imos levar material de barbería e costura. Antes de enviar o colector faremos unha campaña entre as perruqueiras do Grove, a ver que nos poden doar», explica Nati.
Pero esta entidade non só envía colectores ao país africano. Cada certo tempo, Nati e Mustafá vanse visitar á familia deste último. E cada viaxe é aproveitado para levar cousas que se precisan en orfanatos ou residencias de anciáns. De feito, actualmente manteñen en marcha unha campaña para montar un botiquín. Queren recoller medicamentos de todo tipo que serán levados a Marrocos na súa próxima viaxe. «Recollemos cueiros, andadores, cadeiras de rodas ... Este ano imos colaborar tamén cun centro de maiores que hai alí», conta Nati. Todos os interesados en colaborar só teñen que pórse en contacto con esta entidade a través das redes sociais. Ademais, periodicamente organizan tamén anciños benéficos e outras actividades coas que recadan os fondos que lles permiten mandar eses colectores humanitarios a quen máis os necesita.