O Rasu pide a repetición íntegra do partido na Cañiza, e resérvase a opción da denuncia xudicial

O club reclama explicacións da Federación, e agardará a coñecer o alcance real da lesión do seu porteiro para acudir á xustiza


vilagarcía / la voz

O Rasoeiro ultimaba na noite de onte o envío dun escrito ao Comité de Competición da Real Federación Española de Balonmano como resposta á súa indignación por ter que xogar o pasado sábado na cancha do Seaplast Cañiza sobre, denunciou o club grovense, unha pista impracticable pola condensación, que lle custou unha lesión grave do seu porteiro titular, Adrián, e o anuncio deste último do punto final á súa carreira deportiva.

No escrito, explicaba onte o presidente do Rasoeiro, Diego Gondar, o club pídelle á Federación «a repetición do partido» na súa integridade. Isto é, xogar os 60 minutos co marcador de partida a 0, e non desde o minuto 40 co 28-16 que campaba no momento no que a parella arbitral decidía suspender o choque, con Adrián xa lesionado, o seu compañeiro de portería Quique levando un forte golpe nas costas, e o seu adestrador, Kito Parada, enfadadísimo tras non acceder os colexiados a aprazar o encontro como lles pediu antes e durante o mesmo pola situación dunha cancha esvaradía por culpa da humidade.

Gondar engade que «imos pedir que nos expliquen por que se xogou o partido nesas condicións», sinalando ademais que o feito de contar só cun canón de calor ata o consumo do seu combustible na área da Cañiza condicionou o marcador provisional.

Sobre a posibilidade de denunciar pola vía xudicial os árbitros pola lesión nun xeonllo de Adrián, o presidente do Rasu dixo onte que esta é unha medida supeditada á gravidade da lesión fixada no diagnóstico definitivo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O Rasu pide a repetición íntegra do partido na Cañiza, e resérvase a opción da denuncia xudicial