Emma Torres reuniu ás comparsas para organizar o festival deste ano, que se prevé moi concorrido
23 ene 2019 . Actualizado ás 14:15 h.Falta pouco máis dun mes para o entroido e no Grove, que viven esta festa con especial intensidade, decidiron pórse xa ao choio cos preparativos. En realidade, as comparsas levan xa semanas traballando, e a elas sumarase agora o Concello. A concelleira de Cultura, Emma Torres, reuniuse onte coas principais agrupacións para ver que cambios pódense introducir este ano no programa de actos. A súa principal preocupación é que haxa demasiadas comparsas que queiran presentarse ao festival, pois o certame está previsto para unha decena de agrupacións e incluír outras a maiores faría que se alongase máis do desexable.
O entroido do Grove atravesa un dos seus mellores momentos. De feito, nos últimos anos organízanse cada vez máis comparsas, moitas das cales queren competir no tradicional festival que se celebra no pavillón. No 2018 foron unha decena as agrupacións da localidade que coparon todos os postos do certame, deixando ás asociacións de fóra que querían participar sen oco. A situación podería repetirse este ano, se se cumpren as previsións. Segundo Torres, todo parece indicar que nesta ocasión serán quince as comparsas que están a ensaiar para participar nas festas. Haberá que ver se todas queren concorrer ao festival. De feito, ese é o principal temor da concelleira de Cultura, que onte reuniu ás agrupacións para saber cantas están dispostas a participar no certame e en que condicións debería celebrarse este para garantir un oco a todos os interesados. Porque o Concello non está polo labor de que algunha das comparsas mecas poida quedar fóra desta cita.
No encontro falouse tamén doutras actividades do entroido, como o desfile do martes, que é outro dos actos que conta cunha maior participación dos grovenses. As bases deste certame, e as do festival, serán aprobadas e publicadas en breve. En principio, prevese que a contía dos premios sexa a mesma que en exercicios anteriores. O que está no aire é a carpa que, desde hai uns anos, instalábase no Corgo. Torres mostrouse partidaria de non instalala nesta ocasión e de organizar as actividades noutro recinto ou ao aire libre.
Ao parecer, hai 15 agrupacións ensaiando para o concurso do pavillón