Os muíños do parque eólico de Castrove buscan instalarse en Meis, Pontevedra e Poio
MEIS
Os representantes de catro municipios e sete comunidades de montes coordinarán as súas alegacións para frear o proxecto
01 ago 2021 . Actualizado ás 05:00 h.O rexeitamento ao parque eólico que se proxecta no monte Castrove e guinda a súa sombra sobre catro municipios das comarcas do Salnés e Pontevedra comeza a cobrar forma. Na reunión convocada para o venres pola tarde participaron representantes dos concellos de Pontevedra, Meis, Poio e Barro, así como os portavoces das sete comunidades de montes en man común que ven afectadas por esta iniciativa. Cinco delas pertencen a Meis , unha a Pontevedra e a restante a Poio . Todos eles acordaron coordinar as súas alegacións fronte a un proxecto que consideran precipitado e coinciden en rexeitar.
A alcaldesa de Meis, a socialista Marta Giráldez, preside tamén a Mancomunidade do Salnés. A rexedora entende que, para empezar, a idea do parque expónselles de forma abrupta e coa escasa marxe de trinta días para argumentar o que consideren oportuno. «Non creo que sexa de recibo recibir unha comunicación da Xunta cun enlace para poder consultar un anteproxecto que resulta bastante confuso e un prazo de apenas un mes para presentar alegacións, no caso de non estar de acordo», sinala Giráldez, subliñando que este proceder obriga aos concellos concernidos a gastar fondos en asesoramento e informes que non son baratos, precisamente, ademais de interferir con outro tipo de usos do monte moi distintos, nos que varios deles están a traballar.
O parque, explica a alcaldesa de Meis, constará de catro aeroxeradores. Dous deles instalaranse en Meis, un colocarase en Pontevedra e o cuarto será implantado en Poio. Todos os aparellos se levantarán sobre terreos cuxa titularidade corresponde aos comuneiros. «Sobre o papel diríase que son poucos aparatos, pero debemos ter en conta toda a instalación que implica un proxecto así, e as liñas de alta tensión que afectarán a unha superficie moi ampla», advirte Giráldez, quen lembra que existe un proxecto da Asociación do Cabalo para situar no cume do Castrove un recinto que permita protexer aos seus exemplares, evitando que invadan as leiras de labradío e propiciando unha nova rede de rutas de sendeirismo. De momento, o pleno da corporación de Meis acaba de rexeitar por unanimidade o desembarco do parque eólico.