O PSOE denuncia que en Meis se estea colocando a estas alturas a iluminación
MEIS
O Concello non iniciou a colocación da decoración do Nadal ata o sábado, día da lotería
27 dic 2018 . Actualizado ás 05:00 h.O Nadal cobra o seu nome do nacemento de Jesús, que a tradición cristiá sitúa o 25 de decembro. Non parece, polo tanto, que a conmemoración deste clásico evento deba colocarse máis aló desta data. Con todo, o touro parece ter collido de cheo aos operarios contratados polo Concello de Meis. Polo menos, así o denuncia o grupo municipal do PSOE, que advirte de que a iluminación do Nadal aínda estaba a ser colocado onte, un día despois da xornada central das festas.
«Parece máis unha historia do día dos santos inocentes, pero si, a 26 de decembro, operarios da empresa aínda estaban na parroquia de San Martiño colocando o alumeado de Nadal», subliña a portavoz socialista, Marta Giráldez. É máis, o PSOE lembra que o sábado pasado, coincidindo co sorteo da lotería de Nadal, o Concello estaba comezando a instalación das luces, «ao contrario dos demais municipios da comarca, que levan semanas gozando do alumeado de Nadal».
Para Giráldez, trátase da gota que colma o vaso da paciencia dos veciños: «O alcalde ordenou colocar o alumeado en máis zonas que nos anos anteriores, cun claro interese electoralista, pero a cousa non lle saíu ben, porque o 40 % do alumeado non funciona».