A militancia e os concelleiros do grupo de goberno apoian a Viéitez «sen fisuras»
15 oct 2020 . Actualizado ás 13:39 h.Unidade e respaldo total ao alcalde de Meaño , Carlos Viéitez. Ese é a mensaxe que trasladou este sábado o PP meañés, desde unha dobre vertente. Os cinco concelleiros do grupo de goberno asinaron un escrito de apoio ao rexedor despois de coñecer que o Comité de dereitos e garantías do PPdeG resolvera expulsalo do partido. O PP alega que o alcalde cometeu unha falta grave de deslealdade e outra de desobediencia ao entender que pactou o seu soldo co PSOE a cambio de sacrificar un vogal para o PP na Mancomunidade do Salnés, vocalía que resultou fundamental á hora de inclinar a balanza a favor das forzas de esquerda no órgano comarcal.
«Consideramos de todo inxusta e inxustificada a resolución adoptada, porque ante o contexto social de división entre os simpatizantes e votantes do PP de Meaño e os simpatizantes e votantes da agrupación veciñal Meaño Independente, Carlos Viéitez antepuxo a súa lealdade aos veciños, ao Concello e ao seu propio partido, ao acadar ser a forza máis votada e a alcaldía de Meaño, aos seus propios intereses, que acadaría manténdose na alcaldía cun hipotético apoio ou pacto de goberno coa agrupación veciñal, no cal non participariamos», señala el PP de Meaño.
Un goberno, con que siglas?
Xunto a este escrito, o PP de Meaño distribuíu un comunicado en nome da militancia no que apoia a Viéitez «unanimemente, sen fisuras». O que non aclaran é cal vai ser o futuro do partido neste municipio. Manterán os concelleiros a militancia no grupo popular ou conservarán as súas actas fóra destas siglas? Compañeiros de Viéitez informan de que, máis aló da fórmula que escollan finalmente, o que teñen claro é que o seu futuro político está ligado ao do rexedor, e gobernando.
A agrupación local do PP quixo mandar onte unha mensaxe de «tranquilidade e firmeza» aos veciños anunciando «bos xeitos, moita dedicación e traballo» nos tres anos e medio que quedan por diante de mandato.
O PP foi o partido máis votado nas eleccións municipais en Meaño, pero non tanto como para obter a maioría. Tras fracasar as vías do pacto cos independentes e o PSOE, os populares emprenderon o camiño en minoría, e os obstáculos non tardaron en chegar. Carlos Viéitez tivo que buscar alianzas puntuais cos socialistas, algo que lle valeu acusacións de transfuguismo por parte do alcalde de Vilanova, Gonzalo Durán, e, finalmente a súa expulsión das filas populares.