A vítima estaba repartindo o pan ao redor das nove da mañá cando ocorreu o suceso. É o segundo edil que perde o PSOE en catro meses tras a morte de Carlos Castaño
24 ene 2019 . Actualizado ás 11:36 h.Eduardo Touriño Criado, veciño de Catoira de 46 anos de idade e concelleira do PSOE neste municipio, faleceu hoxe vítima dun atropelo.Era natural da parroquia de Abalo e tiña dous fillos.
Os feitos ocorreron pasadas as nove, na estrada PO-548, a poucos metros da casa consistorial, cando o home, que estaba a facer a habitual repartición do pan da mañá, foi acadado por un camión.
Ata o lugar desprazáronse efectivos de urxencias sanitarias, pero xa non puideron facer nada por salvarlle a vida. A fatal noticia prodúcese tan só catro meses despois de que falecese o concelleiro socialista Carlos Castaño Ferreirós tras sufrir un accidente cando practicaba kitesurf na Illa.
O alcalde de Catoira, Alberto García, está profundamente afectado pola perda dun compañeiro e amigo co que leva compartindo tarefas de goberno desde o ano 2007. No Concello xa ondean as bandeiras a media hasta e o rexedor ten previsto a esta hora reunir á corporación para convocar algún acto institucional en sinal de duelo.
Eduardo Touriño era primeiro tenente de alcalde e delegado da área de Obras e Servizos. Esta mesma mañá, antes de iniciar a repartición do pan, achegouse á nave municipal para distribuír o traballo do día dos operarios, segundo relata o alcalde, «como facía todas as mañáns».