Cambados estrea un punto limpo móbil que permite reciclar ao lado de casa
CAMBADOS
O servizo rotará por sete lugares do pobo e as parroquias ao longo do mes
21 oct 2021 . Actualizado ás 05:00 h.Se alguén esgrimía algunha escusa para non depositar o lixo no lugar adecuado acábase de quedar sen argumentos. O Concello de Cambados pon este mes en circulación un servizo itinerante que permite desprenderse deses residuos que, pola súa natureza, quedan fóra dos colectores para restos orgánicos, envases, papel, vidro ou pilas. Os cambadeses debían dirixirse ao momento limpo situado en Sete Pías para desfacerse dunha radiografía, unha lámpada fluorescente ou un móbil ou pequeno electrodoméstico que xa non funcionan; agora non teñen máis que achegarse a un dos sete lugares habilitados para situar o punto limpo móbil á hora de baleirar o trasteiro.
Trátase dunha instalación deseñada para verter os distintos tipos de residuos de forma doado e limpa. A estrutura é de grandes dimensiones pero non o suficiente como para albergar unha lavadora ou un colchón. Os voluminosos deberán seguir depositándose no punto limpo de Oubiña ou ben na porta de casa, onde son recolleitos polo servizo porta a porta que ofrece o Concello de forma gratuíta dous días á semana. Tampouco se autoriza o depósito de cascallos, que se recollen en pequenas cantidades en Sete Pías ou, en caso contrario, debe ser tratado por un xestor autorizado. O de Cambados é o primeiro punto móbil que funciona na comarca e a súa construción e posta en marca é posible grazas a unha subvención da Consellería de Medio Ambiente , financiada con fondos europeos. «Gústanos ser pioneiros, sobre todo en temas de medio ambiente», apunta o concelleiro Samuel Lago, quen confía en que esta experiencia abra o camiño a outros concellos para desenvolver un modelo no que todas son vantaxes. Ademais de facilitarlle a vida aos cidadáns e de favorecer á reciclaxe, supón un aforro económico en canto a que redundará nun abaratamento da factura que o Concello paga a Sogama polo tratamento dos residuos.
O punto limpo foi deseñado e construído pola empresa local Nós Solucións e estará en sete puntos: do 1 a 4 de cada mes, detrás da praza de abastos; do 5 ao 14, no campo da festa de Vilariño; do 10 ao 14, na Modia; do 15 ao 19 no campo da festa de Corvillón; do 20 ao 24 no aparcadoiro da igrexa de Castrelo; do 25 ao 28 en Serantellos, ao lado do colexio salesiano, e os días restantes de cada mes, no campo da festa de Oubiña.
Non é a única novidade en materia de xestión de residuos. O cemiterio de Santa Mariña dispón xa dun punto limpo fixo, específico para a recollida de restos vexetais, veas e plásticos. «É unha mostra máis do compromiso do Concello de Cambados co medio ambiente», apunta a alcaldesa, Fátima Abal.