O mercadillo de Cambados regresa con bo ambiente, moitos postos e seguridade

Xurxo Charlín mostrábase bastante satisfeito ao mediodía de onte polo balance da primeira xornada de volta do mercadillo de Cambados . O edil asegura que traballaran moito para que todo discorrese sen ningún incidente, como así foi. A xornada transcorreu con bo ambiente, con moitos postos e coa importancia engadida de que deixa a sensación de seguridade que para clientes e vendedores tivo a estrea polo protocolo que se estableceu.

O recinto estaba acordoado e soamente podíase acceder a ela polas entradas que deseñara o Concello. En cada unha delas, persoal da empresa de seguridade contratada para a ocasión repartía xel hidroalcohólico a todo aquel que se internaba no lugar, e unha máscara a quen non a portase. Facíano sen maiores problemas, aínda que había quen non o entendía, para asombro dun dos porteiros, que non daba crédito. «É incrible. É pola súa seguridade e aínda tes que escoitar», contaba o home, que levaba toda a mañá a pleno sol, soportando moita calor e algunha incomprensión.

Xa dentro do recinto tocaba explorar. A distancia entre os ambulantes ampliouse e isto provocou que moitos deles tivesen que variar o seu lugar habitual. O posto de calcetíns non estaba onde sempre e había que atopalo. Nada irresoluble, sen dúbida. Algúns vendedores aseguraban que a afluencia de xente non estaba nada mal e o ambiente parecíase ao de calquera día, salvo pola presenza de máscaras diante e detrás do posto.

«Leva dous calzóns para o rapaz e un para o marido», negociaban nun deles.

-Pero ti non vendías tamén braguitas?

-Téñoas na furgoneta. Non a puxen no posto porque aínda nos estamos adaptando-, conversaban uns metros máis aló unha muller e un dos seus ambulantes de confianza.

Á entrada da rúa Nova, o lugar cara ao que se ampliou para poder ter o espazo suficiente para manter a distancia entre postos, o concelleiro Xurxo Charlín charlaba co seu homólogo grovense, que se achegou á vila do albariño para observar o desenvolvemento do mercadillo ante a inminente apertura do meco. Era esa una das zonas quentes pola polémica que se viviu nas xornadas previas tras a decisión do goberno local de levar alí algúns postos. «Entendo que pode causar molestias os veciños, pero era a solución que tiñamos», explica o edil, que asegura que non se produciron queixas. «A »,lgún ambulante díxome que lle gustaba máis esa zona despois de probalaafirma o concelleiro cambadés.

Onte establecéronse máis dun centenar de postos. Non todos os que adoitaban pór os seus bártulos no mercadillo cambadés antes de que a pandemia do covid-19 déselle un xiro, pero si unha porcentaxe moi alta, segundo Xurxo Charlín, que afirma que no goberno local xa empezaron a traballar no redeseño da cita do próximo sábado.

---

---

---