Nos últimos cinco anos a súa participación nos tributos aumentou no medio millón de euros
16 ene 2019 . Actualizado ás 05:00 h.O Concello de Cambados recibirá este ano 2,8 millóns de euros correspondentes á súa participación nos tributos do Estado. A partida é moi similar á do pasado exercicio, pero nos últimos cinco anos a localidade logrou incrementar esta cantidade en 419.052 euros, segundo asegura Xurxo Charlín, concelleiro de Facenda.
Cambados é a terceira localidade arousá no que á contía que recibe do Estado refírese, só por detrás de Vilagarcía e Sanxenxo. Á capital arousá corresponderanlle neste exercicio 7,9 millóns de euros, mentres que Sanxenxo percibirá 3,3 millóns. O resto de municipios percibirá, máis ou menos, o mesmo que en anos anteriores. Só O Grove perde ao redor de 20.000 euros. Nin sequera Meis e A Illa, que baixaron dos cinco mil habitantes nos últimos anos, recibirán unha cantidade inferior á de exercicios anteriores.
Os municipios da comarca arousá repartiranse ao longo deste ano preto de 22 millóns de euros provenientes do Estado. Tendo en conta o número de habitantes de cada un deles, é Vilagarcía a que recibe unha maior contía, de 212 euros por veciño. Séguenlle Vilanova, con 208 euros, Cambados, con 206 euros e O Grove, con 200 euros por habitante. O resto de localidades perciben unha cantidade inferior, sendo A Illa e Meis os que ocupan o último lugar, pois alí o Estado só abona 160 euros por habitante.